Shillong, September 8, 2022: Meghalaya Residents Safety and Security Act (MRSSA) web portal ko bristibar salni bak o a•dokni sorkari jinmana oprake on•angaha. Indake MRSSA web portal o gittimni dilgiparang, nok para on•enggipa rangko aro nok para roenggipa manderangko sandienba uamangni bidingo chugimik u•iataniko gapate web portal o upload kaatna nanggen ine u•iataha.
Ia web-based system ko Shillong songjinmani dam sni gittim rang jekai Nongrim Hills, Nongmynsong, Lapalang, Nongrah, Pokseh, Riat Laban aro Wahdienglieng gittim o a•bachengatangchenggen.
MRSSA ko ra•gatani miksonganiara songjinma o nok para ra•e roenggipa pilak manderangni bidingo altuen tal•e ma•sina gita man•gen ine ong•a.
NIC ni tarigipa Online Application o nok malik rang aro nok para roenggipa, gittimni dilgiparangni sing•sandianiko matchote uamangni ra•chakaniko man•e register kaatna gita man•gen.
Chief Minister Opis ni karimskarangoni u•iatani gitade, nok malik rang EPIC Card ko on•angna nanggen indake nok para roenggiparang uamangni EPIC Card, PAN Card, Driving Licence, Aadhar Card, Student ID Card, Passport no rangoni jekoba ge•sako on•e register kaangna gita man•gen. Web Application ko Computer, Laptop, Tablets ba Mobile Phone jeoniba kuliangna gita man•gen aro documents rangko upload kaani bidingoba tale u•iatanirang gnang ine u•iataha.
MRSSA Web Application ko ra•gatanichi a•dokni sorkari pilak nok para on•enggipa malik rang aro nok para roenggiparangni chugimik talataniko altuen niksona man•gen.