Damra, Aug 27, 2022: Bilsianti manirongbaenga gita ia bilsioba Damra Bakrapur-o Chang 106-gipa Pa Sonaram R.Sangma-ni siani salko gisik ra•e Sonibar salo maniangaha.
Ia program-ko Sonaram Sangma Memorial Trust Society aro GSU Assam State Zone (ASZ) ong•atangaha. Indake ia maniaona Rabha Hasong Autonomous Council (RHAC)-ni Chief Executive Councillor (CEC) Tankeswar Rabha mongsonggipa sokgipa ong•e bakko ra•angaha, unbaksa Dudhnoi-ni MLA Jadab Swargiary donpaha.
Unbaksana gipin okgamako man•ne sokbagiparanga RHAC-ni Excutive Councillor Frylin R.Marak, GSU-CEC President Tengsak Momin, Damas-ni gitcham MDC Dolly K.Sangma, dingtang dingtang kolege-ni dilgiparang, chatro chatrirang aro bang•a manderang dongpae bakko ra•angaha.
Sonaram R.Sangma A•chikrangni gisepo skanggipa British sorkari kosako dabie A•chik jat aro a•songni namgnina dakgrikdilchenggipa A•chik matgrik ong•achim ine Tengsak Momin aganangaha. Uni ka•dongbee British sorkarini kosako dakgrikdilanichi da•alo A•chik jatna ramako mesokangaha. Uni dabianirangko chu•gimik chu•atangna man•jaoba, A•chikrangni a•dok chigako a•kange donangaha. Uni gimin Sonaram Sangma-ko A•chik sakantian mande ra•na krachongmota ineba Tengsak Momin agandapangaha.