Shillong, August 27, 2022: West Jaintia Hills a•jao re•anggipa August 10 tarikoni gimaenggipa Taxi Driver saksa Damehipaia Papeng-ko so•otanio jak donggipa I Love You Talang minggipa me•asa saksako pulisrang uko rim•aha ine u•iataha.
I Love You Talang-ni pulisna ku•rachakani gitade uni sakgittam ripengrang baksa Taxi Driver-ko rim•srukange uni gitoko rageke so•otenba uni manggisiko Jowai By-Pass sepango donggipa Mukhoi Mihmyntdu, Matchu palram bajaro galaha ine parakaha.
Indake Taxi Driver Papeng-ko so•otanio I Love You Talang baksa jak donggipa sak gittam manderang Tell Me Pyrtuh, Ramesh Dkhar aro Sampher Ksoo-ko pulisrang rim•aha.
Dos dakgipa sakbri manderangko pulis custody-o sal 14 donna Court raiko on•aha.
Unbaksana re•anggipa antio East Jaintia Hills a•jani Mynkre songo tourist gariko salgipa saksa Fullmoon Kharsanoh-ni manggisiko man•aha. Uni ja•a, jakko kae uko gitok rageke so•otaha.
Pulisrangni potchipani gitade Fullmoon-ko so•otanio rim•a man•gipa sakbri manderangan ong•na nanga ine u•iataha.