Tura, August 27, 2022: Garo Students Union (GSU-CEC) Tura, GSMC aro gipin NGO-rang gnigipa chang ba second phase-na jingjengate, salgittam joljol MeECL office-ko picketing ka•ani tom•tome matchotangaha.
GSU-CEC aro gipin NGO-rang, Garo Hills-o bijoli ching•a tik ong•gija, salanti walantion chang channa ampilgija ching•a, kimita dake neng•nikaniko on•engani gimin, chu•onga gita kam ka•gipa manderangko Garo Hills-o rakkichina dabie jingjengataniko dakengon a•dok sorkari aro Power Minister da•alona kinkingba knachakgija namrenge dongenga ine NGO dilgiparang aganaha.
Uni gimin gittamgipa phase-ko August 29 tarik Sombar saloni September 3 tarikona walo rama champengataniko ong•atangskagen ineba parakataha.
GSU-CEC aro gipinrang August 24 tarikoni MeECL office-ko picketing ka•aniko a•bachengataha.
GSU-CEC, President Zikku Balgra N.Marak-ni aganani gitade, “Chinga indita chang dabianirangko dakgenchimoba, sorkari chingni dabianirangko knachakjaenga. Ching baksa
nangrimgimin Organisation Garo Hills-ni dingtang dingtang biaprango changni chang MeECL Department-ko office picketing ka•e, Skotong Minister Conrad Sangma-na iani bidingo janape Memorandum-ko on•angaha, indiba Skotong Minister, Power Minister aro MeECL department-ni bil gnanggiparang chingni dabianirangko knachakjaenga. Chingni dabianirangko sorkari knachakja dipet chinga jingjengatanirangko dontongjawa, chinga mikkanchi iana bate rakbata ja•kurangko ga•e, jingjengatanirangko ong•atangkugen” ine Zikku N.Balgra parakataha.
Garo Hills-o donggipa dingtang dingtang MeECL office-rang jekai Dadenggre, Williamnagar, Phulbari, Mendipathar aro Selsella jolrango bang•a manderang NGO-rang baksa bakrime MeECL Department-ko office picketing ka•anio sorkarini maming aganchakaniko man•jaha.
Indita chang jingjengataniko dakengoba sirkari namrenge ra•engani gimin gittamgipa phase-ko a•bachengate walo rama champengataniko wal 9 bajioni pring 5 bajiona dakangskagen. Uni gimin pilak A•chik a•songo songdongeng sakantian NGO-rang baksa bakrimpachina GSU dilgiparang ku•mongrimaniko on•ataha.