GSU-CEC, August 24-oni 26 tarikona MeECL office-ko picketing ka•angtaina tik ka•a 

Tura, Aug 19, 2022:Garo Students’ Union (GSU) Centre Executive Committee (CEC) August 17 tariko tom•e chanchirimaniko dakenba, August 19 tariko West Garo Hills a•jani Deputy Commissioner-na lekka sedoate, re•baenggipa August 24, 25 aro 26 tarikrango MeECL Office-ko Garo Hills gimiko picketing ka•anggen ine parakataha.

GSU-CEC aro GSMC re•anggipa salrangonin Garo Hills-o bijoli ching•a tik ong•jaengani gimin, chu•onga gita kam ka•giparangko kamo rakkidapchina lekkarangko seate, dabianirangko dakenba jingjengatanirangko dakengachim, indiba a•dok sorkari maming aganchakaniko on•kujaenga. Indake ong•engon, August 24, 25, 26 tarikrango Garo Hills gimik MeECL office-ko picketing ka•angtaigen, uni gisepon sorkari maming aganchakaniko on•taija ong•ode, August 29 tarikoni September 3 tarikona wal 9 bajioni pring 5 bajiona Garo Hills gimiko rama champengataniko ba night road blockade-ko ong•atangskagen ine GSU-CEC-ni President Zikku Balgra N.Marak parakataha.

Uni gimin Garo Hills-o songdongenggipa pilak NGO-rang, ma•a paarang, jong-ada, no-abirang Garo Hills-o neng•nikenggipa bijoli tik ong•gijaniko pilakan ma•sia, uni gimin jingjengatanio apsan ku•monge bakko ra•angpachina GSU President mol•molataha.