Shillong, July 26, 2022: All India Trinamool Congress (AITC)-ni dilgipa Dr Mukul Sangma, sima ario ong•enggipa obostani bidingo agantalataniko on•angaha.
“Chinga Meghalaya aro Assam a•dokni sima ari jolo so•sojengjeng ong•aniko namatna re•jomaniko dakenga. Chingni ku•rangko an•ching a•songni sorkari knachakna nangchongmota. Sima arini obostako namatna saksande ja•ku de•na man•chongmotja. Ja•ku de•genchimoba pilakni ra•chakna man•gipasa ong•na nanggen. Assam-ni manderang aro Meghalaya-ni manderang, uamangni agan chanchirime ja•ku de•aniko kusi ong•e ra•chakgipa ong•na nanggen. Indiba ra•chakjagenchimode, sorkari maming saloba drana man•chongmotjawa. Indake Meghalaya a•dokni manderang sorkarini ja•ku de•aniko ra•chakna namnikjae jegalaniko dakenga. Assam a•dokna pakwatako man•enggipa bang•a songrang Khasi Hills a•jani bakrang ong•a. Indake ua songrango bang•a A•chikrang songdongenga. Uamang skang chengonin Meghalaya a•doko dongbaenga, indiba uamangko ma•ekgalani gimin namnikjae, chinga Border Agreement-ko jegalenga. Ia Border Agreement-ni bidingo sorkari maming aganchakaniko on•kujaenga, uni gimin iako namatna somoi dongengkua ine chinga jinmani mikkango jegalaniko mesokenga. A•dok sorkari ia obostani bidingo bon•kamgipa raiko on•na skang name chanchina nangchongmota” ine Dr Mukul Sangma agan talatangaha.