Nongpoh, July 26, 2022:Re•anggipa March 29 tariko Assam aro Meghalaya a•dokni Skotong Minister Himanta Biswa Sarma aro Conrad Sangma MoU-o soi ka•ahani gimin Sima Ario so•sojengjeng ong•e jegalaniko dakengon, Ri-Bhoi a•jao donggipa Maikhuli songni manderang soi ka•gimin MoU-ko ra•galpilchina dabie Monggolbar salo jingjengataniko dakangtaiaha.
Koborna u•iatani gitade, Meghalaya Pradesh TMC dilgiparang Maikhuli songona re•ange jegalenggipa songni manderangko gronge, uamangni jingjengatanina chakpae bakko ra•angaha.
Jingjengatanio dongpagipa AITC dilgiparanga Shillong-ni AITC dilgipa James Lyngdoh, Mauhati-ni AITC Dr Saraline Dorphang, AITC State Joint Secretary Kamal Marbaniang, Ri-Bhoi-ni AITC Convenor Gilbert Nongrum, Jirang Block-ni Convenor Ellingstar Nongrum aro AITC Membor Sunmoon Marak bakko ra•angpaaha.
Apsan salni bakon Mallangkona songni manderang Assam aro Meghalaya a•dokni sima ario tom•tomgijanirang batroroengani gimin sorkarini kosako jegalaniko ong•atange soi ka•gimin MoU-ko ra•galpilchina dabie jingjengatanio TMC dilgiparangba dongpae bakko ra•angaha.