Shillong, July 15, 2022: South West Khasi Hills a•jani dam bri songrango transformer nosto ong•ani a•sel bijoli gri andal mitdik dongenga ine u•iataha. Ia obostani bidingo Federation of Khasi Jaintia Garo People (FKJGP), SWKH a•jani Sub-Division Officer aro Meghalaya Power Distribution Corporation Limited (MePDCL), Mawkrywat Division-ni Officer-na lekka sedoataha.
Transformer nosto ong•ani a•selo bijoli gri andal mitdik dongna nangenggipa songranga, Jakrem, Jashiar, Laitnong aro Shngimawlein ong•achim. FKJGP dolni President, Kenes L. Nonglait-ni kobor ra•timgiparangna u•iatani gitade, songo donggipa manderang badi ka•enba uamangni neng•nikanirangko bang•a changon chagrongenga. Ia obostani bidingo FKJGP SDO-na aganjanapangaha, indiba ua Mawkrywat MLA Renikton Lyngdoh Tongkhar-ko grongchina aganangskaaha.
MLA-ara bijolini gimin maiko dakna man•gen, Department-ni manderangsa ia obostarangkode nirok sandie jinmani namgnina tarie on•na nanga ine aganangaha.