Shillong, July 11, 2022: Meghalaya a•dokni Pulisrang niamgri sona badingenggipa Assam aro Meghalaya a•dokni sak 5 manderangko rim•aha ine koborna u•iataha. Ua manderangoniko tangka gong lak 50 ong•gipa damni sona aro tangka lak 27-ko man•aha.
Iani bidingo Director General of Pulis (DGP) LR Bishnoi-ni u•iatani gitade, June 24 tariko saksa Abu Bakkar-ni jako gangipa Wristband-o gram 819-ni sonako Assam a•dokona ra•angmitingo pulisrangni rakbee kam ka•anichi uko Ri-Bhoi a•jao rim•na gita man•aha. Indake uko rim•e sing•sandianiko dakon, ja•mano iana batgipa sonarangko ra•bana amenga ine aganaha. Bakkar-ni agana gita Meghalaya Pulis aro Assam Pulis melie Barpeta songni saksa Shah Jahan-ko rim•aha, unbaksana tangka gong lak 27-koba man•aha. Una agreba ja•riktimgipa Barpeta songni saksa Siddique Ali-koba rim•chapaha.
Pulisrang, sona badinggiparangko rim•na gita bang•a dolrangko tariangaha aro uandake rim•a man•gipa manderangni kobor on•ako man•ne Laban gittimni saksa Aziz Lyngdoh aro Mawlai-ni saksa Subali Kharbani-ko rim•aha.
Rim•a man•gipa sak 5 manderangoniko, Mobile Phone ge 10, ATM Card, Duplicate ID Card-rangko man•aha.
Sona bading chiwalenggipa manderang Bangladesh-oni India-ona Sonarangko ra•baenga. Uamang Meghalaya-ona ra•bae uko Guwahati, Siliguri aro uandake gipin gipin a•dokrangona ra•angengachim. Ia obostani gimin tal•bate ma•sina aro niamgri badingenggipa manderangko rim•na sing•sandianiko dakengkugen ineba DGP u•iataha.