Baghmara, July 1, 2022: Baghmara jolni nangrimgimin dingtang dingtang NGO-rang jekai GSU, ADE, FKJGP, AYWO, AHAM, GSMC aro songni manderang apsan ku•monge, Baghmara Civil Hospital mikkango jingjengataniko dakangaha.
GSU Southern Zone-ni President, Chuang Houser M.Sangma-ni u•iatani gitade, Baghmara Civil Hospital building mikka selani gimin, sanna bannako man•enggipa manderang namen neng•nikaniko man•enga. Una agreba hospitalni cielling fan-rang ong•a baksana paikanarang sera bera mitchi mitchi ong•ani a•sel sagiparang namen neng•nikaniko man•enga. Uni gimin NGO-rang iarangko taridape on•china changni chang dabianiko dakahachim indiba sorkari aro department-ni authority-rang knachakja ine u•iataha.
Baghmara Civil Hospital, bimingnasa sorkari hospital ong•aia maming namgni dongja, sagiparangko gipin biaprangchisa ra•ange sanna gita nangenga. Uni gisepon kangal cholgri manderang nama sanna bananiko man•jani a•sel basakoba janggitangko gimaatenga ineba u•iataha. Sagiparangna nama sanna bananiko on•na gitaba dokdor-rang chu•ongjani a•sel bang•a neng•nikaniko man•enga.
A•dok sorkari NGO-rangni dabianiko knachakteljani gimin, June 30-oni July 1 tarik Sukrobar salona jingjengataniko dakangaha. Apsan dake mikkang antioba dontonggija jingjengataniko dakangkugen aro dabianiko aganchakja dipet jingjengataniko dontongjawa ine parakataha.
Indake jingjengataniko dakengon, NGO-rang Sukrobar salo Medical Superintendent-ko gronge agangrikanio Medical Superintendent, iani bidingo proposalko tarie NHRM aro a•dokni chubata gadango kam ka•enggiparangna on•atgen ine aganataha. Indiba ua kattarang ka•dongna man•gipa ong•ja, ineba u•iataha.
Iasan ong•aigija hospital mikkango re•na namsranggijagipa ramako Sukrobar salo PWD department-ni JCV-ko ra•bae tariataha ine GSU Southern Zone-ni General Secretary Sengrak Sangma u•iataha.