Shillong, June 15, 2022: Bang•a chadamberang Klas 11 aro 12-ko poraina gita Govt skulrangko donchange Private Skulrangosa porairongbata ine Education Minister Lakhmen Rymbui parakataha.
Govt skulko niatgenchimode, private skulrang gita nama bimingko man•pagipa ong•ja. Indiba Govt skulo skigiparangna sorkari dormaharangko name on•enga.
“Bang•a skulrang jekai St. Anthony’s, St. Edmunds, St. Mary’s aro uandake bang•a private skulrango poraienggipa chatro chatrirang napbata. Indake Govt skulrango napgipa chadamberang komia. Bilsi bongani jamango 2022 bilsio poraienggipa chatro chatrirangni pass percentage baritaiaha aro namdapaha, indiba Garo Hills-ni chatro chatrirang rakbate aro gong•bate poraikuna nangenga. Ia obostani bidingo Garo Hills a•jani Deputy Commissioner aro Education officer-rang baksa batanggimin bilsi gni joljol, chinga aganchanchirimaha. Garo Hills-ni chadamberang gong•e poraianuchi re•baenggipa bilsirango nambata result-ko ra•bagen ine ka•dongsoenga” ine Education Minister Lakhmen Rymbui parakataha.
Private Skulrang maikai Govt Skulrangna bate nambatenga ine sing•on, Lakhmen Rymbui “Sorkari skulo skigiparangna jaantin nama dormaharangko on•enga, unbaksana uamang trainingko matchotgiminrangsa ong•a. Indide bisongara maio ja•manchake chatro chatrirangko nama gadango pass ka•atna man•jaenga” ine aganchakaha.
SSLC porikkasan ong•aigija chatro chatrirang, bang•a porikkarangko mikkangchi sena gita nanggen. Uamang dontonggija bimchipe miksongatangko chu•sokatja dipet krenge aro gong•e poraiangkuna nanggen ineba agandapataha.