East Jaintia Hills-o Transformer ge 30 nosto ong•e dongenga

0

Shillong, June 15, 2022: East Jaintia Hills a•jani manderang bijolini a•selo bang•a neng•nikanirangko chagrongna nangenga.

A•jao ge 30 transformer-rang nosto ong•e, dongengani a•sel bijolina manderang neng•niktokenga ine koborna parakataha.

Ia obostako MePDCL Department, Khlieriat Distribution Division Moowakhu-ni Executive Engineer H. Iacasis-na Federation of Khasi Jaintia and Garo People (FKJGP) Khlieriat Circle u•iataha.

FKJGP Khlieriat Circle-ni dilgipa, Michael Chyrmang-ni u•iatani gitade, ia obostani bidingo ua Executive Engineer baksa agan golpogrikangaha. Khlieriat, West Lumsiatthong songo antignina kingking nosto ong•e dongenggipa transformer-ko tarie on•china didiangaha.

“Ia obostako Head Office-ona sokataha aro ta•raken kamrangko a•bachengatgnok ine Executive Engineer aganataha. MePDCL Department-ni manderangara maikai transformer-rangko chu•onge rakkijaenga? Mikka chima waani somoio bijolirang nosto ong•na altua aro poraienggipa, kam ka•enggipa pilak manderang neng•nikaniko man•toka. Nokantichiko ra•enggipa light bill-ni tangkarangko maio jakkalskaenga, ua tangkarangko maina transformer tarina jakkalskajaenga” ine sing•doangaha.

FKJGP ia obostani bidingo MLA Kyrmen Shylla baksaba golpoaha aro ta•raken manderangni namgnina tarie on•china didiangaha.

Leave A Reply

Your email address will not be published.