Shillong, May 7, 2022: Mnisal Sukrobar salni attam 3 bajimango Mumbai pulisni u•iataniko kobor man•soe, Meghalaya a•dokni pulisrang Nigeria a•songni sak 6 manderangko Ri-Bhoi a•jao rim•aha ine koborna parakataha.
Koborko man•soani gitade dos dakgipa sakdok Nigerian a•songni manderang Mumbai songjinmao mande so•otani mamlao bak dongachim aro uamang Meghalaya-ona re•bae, Bangladesh a•songchi re•angna miksongengachim. Mumbai pulisni kobor on•atako man•soani bakan Meghalaya pulisrang uamang sak 6-ko rim•na sandianiko a•bachengataha. Pulisrang uamangko Ri-Bhoi a•jani Umsaw songo tourist sumo ML-10B 9779 gario re•bamittingko rim•na man•aha ine u•iataha.
“Rim•a man•gipa sak 6 Nigerian a•songni manderanga bilsi 43 ong•gipa Eze Christopher Obasi, bilsi 45 ong•gipa Ahukanna Chinonso, bilsi 36 ong•gipa Obi Francis Osita, bilsi 29 ong•gipa Okoro Kelvin Chidozie, bilsi 37 ong•gipa Emanual Agbeyi aro bilsi 38 ong•gipa Osagiede Godstime ong•achim. Uamang sak 6-ko Waliv Pulis Station-o CR case no. 481/2022, Under Section 302/364/201/323/143/146/149 IPC-o pangchake mamlako segataha aro ua somoioni Mumbai pulis uamangko rim•na sandiengachim” ine u•iataha.