Shillong, Dec 20, 2022: NPP dol Skotong Minister Pa Conrad Sangma-ni dilanichi adita bilsirangna a•doko namen tang•doaniko nikna man•aha.
Indake ong•engon, adita jarangna skang NPP dolo bang•a dingtang dingtang gipin dolrango kam ka•giparang aro dilgiparang an•tangni gamchatgipa somoiko ra•e, bil jak gimikchi chakpaaniko on•ne NPP dolo napeaha. Apsandake, December 19 tarik Sombar salo NPP dolo napegiparanga East Shillong-ni MLA Dr Ampareen Lyngdoh, West Shillong-ni MLA Mohendro Rapsang, Narpuh-ni MDC Emlangky Lamare-ko NPP dol kusi ong•bee rimchaksoaha.
NPP dolo napegiparangko, Skotong Minister aro NPP National President Conrad K.Sangma, Deputy Skotong Minister aro NPP National Vice President Preston Tynsong, Rajya Sabha MP aro NPP State President Dr WR Kharlukhi, NPP State Working President Prof. Don Kupar War, Nartiang MLA Sniawbhalang Dhar, Shillong City NPP President Wanlamphang Kharmujai, Shillong-ni NPP Womens’ Wing District President Jasmine Lyngdoh, Shella-ni NPP dilgipa Santa Mary Shylla, North Shillong-ni Block President Ransom Sutnga, Pynthorumkhrah Block President Rocky Hek, Mawlai Block President Teiborlang Pathaw, MDC Fantin Joseph Lakadong, NPYF State President Kitborlang Nongrem, Shillong City NPYF President Mayborn Rangthap, East Khasi Hills District President Jied Sing Kurbah, West Shillong NPP Secretary Mike Pakyntein aro gipin NPP dilgiparangni mikkango mande ra•bee rimchaksoaniko dakangaha.
Indake, re•baenggipa 2023 bilsini Assembly eleksino susana gita sakgni candidate-rangko biming parakatjolaha. Uaranga East Shillong Elakkao Dr Ampareen Lyngdoh aro West Shillong elakkao Mohendro Rapsang.
Tom•anio Mohendro Rapsang NPP dolo napena cholko man•ahani gimin an•tangni kusi ong•aniko parakangaha. Mohendro Rapsang an•tangna chakgiparang uko didiahani gimin NPP dolo napaha aro mikkangchi joltangko aro a•dokko namdapatna aro tang•doatna bil gnanggipa Skotong Minister-ni dilanio kamrangko ka•angna gita kusi ong•aniko parakangaha.
Dr Ampareen Lyngdoh, a•dokni manderango ka•dongachongmota, mikkangchi gipin a•palni dolrang baksa bakrimjawa aro a•jatangni manderangna kamrangko ka•angkuna miksonge, da•alo NPP dolo napaha ine kusi ong•aniko parakangskaha. Indake party-ni tom•anio gital ripengskarangko man•ahani gimin namen kusi ong•e, “You’ve got a friend in me” ingipa gitko ring•e mesokangaha.