Tura, Dec 20, 2022: Meghalaya TMC State Level Party Meeting-ko Sombar salo West Garo Hills a•jao donggipa TMC Party Office Tura–o, Meghalaya Legislative Assembly-ni warachakenggipa dol aro TMC dilgipa Dr Mukul Sangma-ni dongpanio ong•atangaha.
Dr Mukul Sangma tom•anio dongpae, Meghalaya TMC-ni niksamsoaniko aro Meghalaya Financial Inclusion for Women Empowerment (MFIWE) Scheme-ni ning•o a•bachengate on•gipa WE Card-ni gimin manderangna talate on•angaha.
Tom•anio Meghalaya TMC-ni dilgipa, Dr. Mukul Sangma jinmana aganengon, “Political party-ni gita kam ka•ani an•ching sakantini daito ong•a aro ku•rachakaniko chu•sokatanian dilgiparangni kam ong•a. An•ching miksonganiko tarie, Democracy-ni bewalo sorkariko rike manderangna dangdike on•na nangchongmota” ine aganangaha. Unbaksana, “Ua indakeba agandapangkuaha, ia scheme-ko bon•chipatgija gisiko donkame kam ka•ani ong•enga. Jedakode, a•dokni manderang tangka paisana neng•nikaniko man•jawa, maina re•anggipa pandemic-ni somoio a•dok gimikni manderang tangka paisana namen neng•nikaniko man•tokaha, uni gisepon NPP-chi dilenggipa MDA sorkari bang•a tangkarangko jakkalsretani a•sel a•doko kangal cha•asianirang batrorona a•bachengaha” ineba aganangaha.
Ia tom•anio Garo Hills gimikni TMC ticketna galenggipa candidate-rang, MLA-rang, gitcham MLA-rang, MDC-rang, gitcham MDC-rang, Block President-rang, District President-rang, District Coordinator-rang aro District Convenor-rang dongpae bakko ra•angaha.
Indake ong•engon, Meghalaya TMC-ni a•bachengatgipa MFI-WE scheme-ko namedake jakkalna nanga, jeon manderang sak hajal 30,000-na bate antisani gisepon Registration-rangko ka•tokaha.
Ia nambegipa scheme-ra me•chikrangna tangka paisachi dakchakaniko on•na gita jao gong 1000 prak ka•e, bilsisao gong hajal 12,000-ko a•doko songdongenggipa nokdang ge•antini me•chik sakprakna on•anggen.
Una agreba party-ni manderang ta•raken elakka ge•antini nokantiona re•ange, ia scheme-o registration-rangko ka•china didianggen.
Indake Meghalaya TMC, ia scheme-ko nokantiona sokate, Meghalaya a•dokni me•chikrangna ia scheme-ni gita janggi tangani cholko tang•doatgen, ineba Dr Sangma agandapangaha.