North Garo Hills a•jao simsakgija gari salgiparangko sandirikitna a•bachengata

Resubelpara, May 21, 2022: Adita salrangna skang North Garo Hills a•jani Deputy Commissioner, RP Marak jekon manderangna u•iata gitan, gari a•sel ong•anirang batroroengani gimin, a•sel ong•anirangko champengna, North Garo Hills a•jani DTO office-ni Enforcement Staff-rang aro pulisrang apsan nangrime chonna dal•a pilak garirangkon North Garo Hills a•jani dingtang dingtang biaprango sandirikitanirangko a•bachengataha.

Maina da•ororo bang•a gari salgiparangan nangana bate bosturangko gatprete salgiparang, gari lekkarangko ra•bitgijagiparang aro simsakgija skatang gari salgiparang tangka gong 2,22,300-ko dai (fine) gamanirangko May 10, 11, 16 aro 18 tarikranggoni dingtang dingtang biaprangon a•bachengataha.

Unbaksana, ua tarikrangosan ong•aigija mikkangchiba dingtang dingtang biaprang aro tarikrango apsan bakrime pilak garirangkon sandirikitaniko pangnan dakanggen ine parakataha.

Uni gimin pilak gari salgiparang boturangko nangana bate gatpretgija, simsakgija skatang garirangko salgija aro gari lekkarangko ra•bitgija North Garo Hills a•jao garirangko salna man•jawa ine mikkrakataniko on•ataha.