Tura, May 17, 2022: Meghalaya a•dokni Skotong Minister, Conrad Sangma Monggolbar salo CHAMHANA GW-Refuse Derived Fuel Plant-ko WGH a•jani Skotong song Tura Rongkhon Songgital-o oprake on•angaha.
Ia Plant-ko oprake on•ani somoio Korean Republic-ni Indian-ona re•bagipa Ambassador Chang Jae-Bok, aro unbaksana New Delhi-ni Korean Embassy, Lady Ambassador aro uni dolrang bakko ra•angpaaha.
India a•songni Meghalaya a•doko skanggipa, Refused Derived Fuel Plant-ko oprakange on•enggon, “Ian an•chingna gisik ra•beani sal ong•a. Ia Derived Fuel Plant-ko Low Cost Budget aro Simple Technology-chi rikgenchimoba, ian ja•bolrangko Energy-ona tarina man•skagnok aro mikkangchi an•ching ia energy-ko koila aro anggal ba charcoal-ni pal jakkalna man•gnok. Anga 2019 bilsiko gisik ra•atenga, angni ia biapko nina re•bamiting somoio indakpile jabol galako nike anga ua jabolrangko maikai gimaatna man•gen ine gisiko chanchion, CHAMHANA dolni manderang angni neng•nikanina namgipa cholko agan ku•patie on•aha. Ia biapko skango gitan apsan ong•piltaigen ine anga ka•donga.Ia Refuse Derive Fuel Plant, jobolrangko komiate uarangko nama kamna jakkalangskagen” ine Skotong Minister aganangaha.
Refuse Derived Fuel Plant Project, jabolrangko cham•ate plastic-rangko energy block-ona tariangskagen. Galgimin jabolrang biap ba a•damko skango gitan apsan ong•attaipilna ja 9 ba 12-rang nanggen.
“Chinga ia Fuel Plant-ko Jowai, Nongstoin aro dingtang dingtang a•jarangonaba sokatgen” ine Conrad Sangma agandapangaha.
Tura songjinmani bang•a manderang jabolrangko chiring chibisikrango galronga, iarangko Developmental Committee-ni manderang nirok sandina nanga aro jabolrangko a•palrango galjachina didiangaha. Tura Municipal Board (TMB) baksa nangrime, uamangni ge•etanirangko ja•rikna nanga ineba aganangaha.
Republic of Korea to India-ni Ambassador, His Excellency Chang Jae-Bok iako oprakanio aganengon, “Anga North-East a•dokrangni gisepo Tura songjinmaonasan sokbachengaha.Tura-ni adita biaprang Korea gita dakanga. Anga bebe ra•a CHAMHANA GW-Refuse Derived Fuel Plant-ko rike on•anichi re•baenggipa sal somoirango Tura-o jabol teng•sa mangkoba nikna gita neng•gnok” ine aganangaha.
Iako oprakanio Tura Municipal Board (TMB)-ni Chief Executive Officer (CEO) Rikse R Marak, TMB-ni Chairman JD. Sangma, Executive Engineer HP N. Sangma-ba jinmana aganprake on•angaha.
Unbaksana Hawakhana Baptist Mondoli-ni Pamong Rev.Frithing D. Sangma ia Plant-ko oprakna skang Isolo bi•e tom•aniko a•bachengdilaha. Uasan ong•aigija a•jani bang•a Official-rang aro Developmental Committee-ni membor-rangba bakko ra•angaha.