Tura, May 18, 2022: West Garo Hills a•jani ning•o ga•akgipa Dalu jolo rong•terangko bading chiwalgipa manderang Supreme Court-ni dongimin niamko pe•e bading chiwalenga ine Tura elekkani MDC Bernard N.Marak parakataha.
“Dalu jolni rong•te badingenggipa manderang Supreme Court-ni dongimin niam gita 30 Metric Tone (MT)-na bate rong•terangko truk garirango gatprete jinmani re•gipa rama gita salruraenga. Registration nombor grigipa truk garirang, chu•onga gita lekka donggijagipa truk garirangko pringo riting riting dake sorok a•samo donako nikkamaia aro darangba ia niam gri badingenggipa manderangni kosako ku•rang on•a dongja, maina uamangna chu•onga gita tangka paisarangko on•manaha. Ia truk garirang 30 MT-na bate rong•terangko gate salrongenga, indiba weight-bridge-ba dollongko salna 21 MT-kosan mesokaia. Sonibar salo BJP dolni dilgiparang sing•sandina gita Dalu-ona re•angaha. Unon chinga bang•a manderang niamni kosako re•e ka•enggipa kamrangni bidingo ma•sina gita man•aha. Ia kamo bang•a Department-ni manderang, Custom Official-rang, GDC, NGO-rang aro bang•a manderang bak dongtoma. Chinga BJP-ni manderang indake niamgri ka•enggipa kamrangko dongdipatana nangnika, ong•jaode ia kamo jak donggipa bang•a officer-rangni kosako ja•ku de•anggen” ine Bernard Marak parakataha.
Sing•sandie nio quarry-oni Export Point-ona gilenggipa tangkaranga, Nokma fees 200, Monopoly 300, State Forest 300, GDC 200, MLP 500, State Forest 200, GDC 200, NGO 200, State Forest 500, MLP 300, NGO 400, GDC 200, MLP 1200, GDC 200, NGO 200, NGO 200, Monopoly 200, Monopoly 200, MLP 200, State Forest 200, GDC 200, NGO 200, GDC 200, MLP 200, Dalu-ona sokahaon Weight-bridge 1,700, Custom 1,000, Forest-150, Sanitization 50, Association- 500, MVI-500, chu•gimik gong hajar 3900 ga•aka.
Truk geprako chu•gimik gong hajar 10,800 ga•aka, DFO hajar 50 challan kingprako ra•enga jekon namedake niatgenchimode, truk gari bolprako gong hajar 11,300 ga•aka. Indake niamni kosako re•e kam ka•enggipa manderangni kosako raka ja•kuko de•na nanga ineba MDC janapataha.