Williamnagar, Oct 23, 2022:Re•anggipa adita salrangna skang Williamnagar Civil Hospital (WCH)-ni sak 5 me•chik staff-rang me•asa doctor saksani kosako matnange, “me•chik staff-rangko an•tangnarara daka, uni aganako manijaode ba dakna gong•jaode, neng•nikataniko on•ne kamoni ong•katbo manenga ine Medical Health Department-ni Directorate-na badi ka•ahani gimin Magisterial inquiry-ko ka•enga”ine u•iataha.
Indake badi ka•ani ja•mano badi ka•gipa sak 5 me•chik staff-rangko District Medical & Health Officer (DMHO) aro uni dol explanation call-na okame, na•song saksa officer-ko badi ka•pilenga, ia mamlao na•songsa bikpile case ong•gen ine ka•mikkenatpilaha. Na•songni matnange badi ka•gipa doctor-ko kam ra•jitange, badia doctor-ko rimbaskana chanchienga, badita sak Williamnagar-ni officer-rang donga, “Chinga gimikan Tura-nirarasa aro doctor-ni nokdangko ma•siama? uni jonggipa Officer, adatang Ukil (advocate) ong•enga, bisong baksa dakgrikna na•song badita poraia donga” ine badi ka•gipa sak 5 me•chik staff-rangko manengaha ineba u•iataha.
Ia bidingo Williamnagar NGO-rang re•anggipa October 23 tariko GSU, AHAM aro Mothers Union-ni dilgiparang Medical Officer-ko gronge, madam na•songba indake Williamnagar, Tura ine basee aganna nangjachim ine aganon, gisiko ding•e aganmanjok ine aganchakaha. Uni ja•mano, “Tura-ni manderang Officer ong•esa Williamnagar-de tang•doane” ine NGO-rangni mikkangon agansrangaha. Iani bidingo CS, Superintendent aro TB Officer baksa nanggrikaha, indakesa ia obostaona sokaha ine NGO-rang u•iataha.