Tura, September 13, 2022: West Garo Hills a•jani Block Development Officer-rang District Rural Development Agency (DRDA) Conference Hall-o tom•bimonganiko Sombar salo ong•atangaha.
WGH a•jao ian skanggipa changna BDO-rang Conference-ko ong•atchengaha. West Garo Hills a•jani Deputy Commissioner aro DRDA-ni Chairman Swapnil Tembe, Additional Deputy Commissioner aro DRDA-ni Project Director Dolrich B G Momin, pilak Block Development Officer-rang, Programme Officer-rangko aro MGNREGA block damsni-ni Additional Programme Officer (APO)-rangko ia tom•anio bakko ra•china okamataha.
Ia tom•anio Deputy Commissioner Swapnil Tembe jinmana aganprakengon, ua Block Development Officer-rang a•jatangna aro biaptangna dakgni kamrangko talate on•angaha. Unbaksana rural jolni manderangna sokatgipa bang•a scheme-rang jekai MGNREGS, PMAY, NSAP aro uandakgipa scheme-rangni kamrangko namedake nirok sandiangchina didiangaha. Ua bang•a officer-rangko office nokko taridapchinaba didiangjolaha.
Indake ong•engon,Tikrikkila C&RD Block-ni BDO Chekame Sangma, jinma apsan melie kam ka•ani bidingo aro PMAY-G scheme-ko name chu•sokate kam ka•ani bidingo parakangaha.
Rongram C&RD Block-ni BDO Monoranjan Sangma, Rural Tourism-o focus ka•e kamtangko ka•enga aro gipin program-rangkoba biaptango chu•soke on•na man•na gita jotton ka•enga ine aganangaha.
Selsella C&RD Block-ni BDO, Emanuel Sangma, Block-ni manderangni chagrongna nangenggipa neng•nikanirangko agantalatangskaha. Unbaksana indakgipa neng•nikanirangoni mikkangchi maikai naljokaniko man•gen, uani bidingoba agantalatangaha.
Dalu C&RD Block-ni BDO Dr.Uttam Sangma, Self Help Group (SHG)-ko ra•baanichi rural jolo donggipa bang•a manderangni janggi tanganirang dingtangaha ine aganaha. Ua VLDP-ni gamchatani gimin aro Dalu Block-o VLDP-ko chu•sokani bidingo kusi ong•e parakangaha.
Demdema C&RD Block-ni BDO Pittingson Sangma, Natural Resource Management, NRMC-ni bidingo training-rangko on•ani gimin mikrakatani program-rangko ong•atenga ine aganangskaha.
Dadenggre C&RD Block-ni BDO Cheman Shira, Sustainable Development Goal-ni bidingo jinmana talate on•angskaha. Sustainable Development Goal-ko maikai Rural Development Program-rangoniko man•na gita amgen, RD Program-o IT-ni gamchatani aro batanggimin bilsirango SDG-ni chu•sokani gimin agantalatangaha.
Gambegre C&RD Block-ni BDO, Shelly Ch. Momin Rural Sanitation, LGD aro uarangni gamchataniko jinmana talate on•angaha.
Indake ia tom•anio Additional Deputy Commissioner aro DRDA-ni Project Director Dolrich B G Momin ni bon•kamao on•angipa Presentation-chi matchotataha.