Tura, June 6, 2022: Bilsianti June 5 tariko ‘World Environment Day’ (WED)-ko manironga gita ia bilsioba Garo Hills-ni dingtang dingtang biaprango, sorok a•samrango, government office sambarango, skul aro kolege-ni bakrarango chatro chatrirang NGO-rang, SHG dolrang aro songni nokni manderang WED-ko maniani sal June 5 tarik Robibar salo ga•akani gimin Sombar salo maniangskaha.
Indake West Garo a•jani District Trinamool Congress (TMC) dol Richard M.Marak-ni dilachi Tura-ni dingtang dingtang gittimrango bolrangko ge•angtokaha aro bol chararangko gittimni manderangna suale on•angaha. Ia bolrangko ge•ani salo West Garo Hills a•jani TMC dilgiparang, Richard Marak baksa Adamkid M.Sangma, Rupert M.Sangma, Rakseng R.Marak aro gipinrang bakko ra•angaha.
Apsandake West Garo Hills a•jani District Administration (DA), Robibar salo DC Office-ni samtangtango bolrangko ge•angskaha.