Shillong, Mar 19, 2023: A•dokni Skotong Minister Pa Conrad K.Sangma, Union Education Minister Dharmendra Pradan-na lekka seate, Meghalaya a•dokni chatro chatrirang, ia bilsio jemangan, Undergraduate Course-rangna NEHU-o admission ra•na siengachim, Common University Entrance Test (CUET)-ko exemption ka•china ba watchina mol•molataha.
Pa Sangma-ni seatgipa chittio, janapatani gitade, re•anggipa antio Meghalaya Legislative Assembly Election-ni result-rangko parakatna nangani a•sel, “State Board Examination”-ni result-rangko parakatanio ja•man chakahani gimin, chatro chatrirang CUET-na admission ka•anio State Level Undergraduate Institution-rango neng•nikaniko chagrongenga ine janapataha.
Union Education Minister Dharmendra Pradan, Skotong Minister Conrad Sangma-ni mol•molaniko knachake, NEHU-o affiliated ong•gipa pilak Meghalaya-ni College-rango ong•a obostarangko nipiltaie, CUET-na admission ka•aniko 2023-oni 2024 bilsiona ra•chakangkugen ine parakataha.
Indake Union Education Minister-ni dingtangmancha bilsisako CUET porikkana admission ka•aniko ra•dodapatani gimin Skotong Minister Conrad Sangma kusi ong•bee, Union Minister-na mittelpilskani kattarangko parakataha.