Rengdim, April 19, 2023: West Khasi Hills, a•jao donggipa Rengdim-o United A•chik Youth Federation (UAYF)-ni chang 7-gipa Foundation Day-ko April 17 tariko maniangaha.
Ia chang 7-gipa foundation day-ko maniani salo bang•a songni nokni dilgiparang, songni manderang bakko ra•angtokaha.
Ia salko manianio UAYF-ni General Secretary Zimechrish G Marak, jinmana aganengon, “Ia dolko bikotani miksongara diltugipa songrangko sorkarini galchipe donenggipa kamrangko niroke kamrangko ka•angna gita miksongani ong•a” ine aganangaha.
Ia dolo pangchake kamrangko ka•engon, bang•a diltugipa songrango sorkarini chu•sokatna man•gija, galchipe donenggipa kamranga jekai sagiparangko sanchakram biap (Health Center), andalaniko jasengatgipa bijoli aro biap damsaoni damgipinona altue kobor-rangko sokatna man•gipa mobile network aro uandake bang•a, dingtang dingtang sorkarini galchipe donenggipa kamrangko chu•sokatna UAYF raken kamrangko ka•enga” ineba agandapangaha.
Unbaksana UAYF-ni President Zillak G. Marak, ia dolko “Chinga batanggipa 2016 bilsini April 7 tariko bikote, re•mikkang salrango sorkarini galchipenggipa kamrangko niroke songsalna kamrangko ka•anio maikai chu•sokgipa aro bilakgipa ong•na man•gen, kang•kare kae kamrangko ka•na miksonganio ia dolko bikotaha” ine aganangskaha.