Tura, November 8, 2021: Covid sabisina tikka su•ani komirikrikenganiko nike WGH a•jani Deputy Commissioner, dokdor-rang aro bang•a dilgiparang Sombar salo Tura Circuit House-ni Conference Hall-o apsan tom•e chanchirimaniko dakangaha.
Deputy Commissioner, Ram Singh, “West Garo Hills a•jao da•odipet covid sabisina tikka su•ani 88% san ong•aiengkua. Indiba Tura-ni sepangbatgipa songrang jekai Asanang, Dadenggre aro gipin gipin songrango tikka su•ani namen komienga. February jaoni June jaona jaanti sugipa tikka manderangko ia sabisioni chel•chakna namen dakchakbeaha.Tikka su•gipa manderang covid sabisioni an•tangtangko naljokata aro sabisiko be•eno napaniko champenga. Da•o re•baenggipa maniani aro bia ka•ani somoirango, gnigipa tikkako matchote su•gipa manderangkosan napna on•na nanga. Indake tom•aniko ong•atgipa manderang, sakantian mask aro rongtal an•talataniko ja•rikchina sokbagipa sakantikon didina nanga.Chonchongipa bi•sarangni klasrang a•bachengaha aro uamangna tikka su•ani sam dongkujaenga uni gimin ma•a paa aro skulo skigipa sakantian bi•sarangko covid sabisioni chel•chakna tikka su•na nanga aro klasoba rongtal an•talataniko ja•rikdilna nanga” ine aganaha.
Unbaksana WGH a•jani department ge•antini ka•rimskarang jerangan tikka su•kujachim, uamangko sal 10-ni ja•mano pangnan RT-CPR porikkako ra•china ge•etaha.
Indake WGH a•jani DMCHO Dr Ivonne Sangma ia tom•anio November 2 tarikona kingking tikka su•giparangni bimingrangko baita sak su•aha uko mesokangangaha. Una agreba ua tikka su•aniko a•bachengdiltaina gita biaprangkoba tik ka•angaha. WGH a•jani ning•o ge 9160 tikka su•ani biaprangko donaha aro sak 210178 manderang skanggipa tikkako su•aha aro sak 122501 manderang gnigipa tikkako su•manaha. Tura Urban jolni ning•o ga•akgipa gittimrangna tikka su•ani dingtang dingtang biaprangko tik ka•angjolaha aro je manderangan tikka su•kujachim uamang ua biaprangona re•ange tikka su•na man•gen ineba u•iataha.
Tura Nokma Council-ni President S G.Momin,
DMHO Dr M Sangma aro ABDK-ni dilgiparang ia tom•anio bakko ra•angaha.