Tura, November 24, 2021: Constitutional Rights Forum (CRF), Kolege-rang aro songrangona re•rurue drae tikka su•atengani gimin Meghalaya a•dokni Chief Secretary-na chitti see u•iatanio Baghmara a•jani Captiain Memorial Government Kolege-o skigiparang aro Garo Hills-o kam ka•enggipa dilgiparang songni manderangko aro chatro chatrirangko drae tikka su•ani bidingo jegale suk ong•gijaniko jinmana parakataha.
CRF-ni chittio janapatani gitade, ia bilsini June jani 23 tariko High Court-ni rai on•gimin kattarangko sakkina sechape 2021-ni PIL case No. 6-ko poraie nichina gita seataha.
High Court-ni raio segatani gita, “Chingni nikanio tikkani bidingo nama namgijani gimin manderangna chu•gimikko talate on•na aro neng•nikaniko chel•chakatna a•dok sorkarini jakon ong•a aro mongsongbate songrango jemangan u•ianirang komiachim, cholgriachim aro saksa sakgni ba gipin dolrang an•tangni miksonganirangko gipatna jotton ka•giparangoni simsakna tikkani gimin kakket ong•a ong•gijani bidingo jangbingbanggipa koborrangko altuen bebe ra•ninggiparang an•tangna chanchichenge raiko ra•na somoiko on•na nanga aro tikkako su•na didigiparang gimikni gita talatchenge tikka su•a su•jana manderangna cholko on•na nanga.
A•dokni bang•a manderangni cha•e tangnagipako drae ra•sekgipa ong•ja, jinmana namgnini bimingo mamingkoba talatchenggija drae kam ka•e cha•gipa manderangko bon•chongdikatna ka•mikkenatgipa ong•ja, indiba Article 38-o segatgimin gita songsalko namdapatna damsan ku•monge jotton ka•anisa ong•a, Article 47-o pangchake kamtangko gimaatna nanggija manderangko gronge saksa sakgipin baksa u•iatgrike tikkani bil aro gipin ong•gni a•sel ba kamrangni gimin golpogrike talatani ong•a indiba Article 39 (a)-ni gita draako man•ne kamtangko gimaatna kene ong•ja. Uni gimin, jinmani namgnina tikka su•ani niamrang manderangni jakgitel ong•e janggi tanganiko maming saloba champengna man•ja; mongsongbate jensalo tikka su•jani a•sel meligrikgija kam ka•e cha•gipako jakgitele janggi tangani, an•tangna jakgitelko man•ani aro jakgitel ong•e kam ka•e cha•aniko bon•chongdikatna ka•mikkenata.
Manderangna tom•tomgipa aro miksonga gnangipa niamrangko songsalo apsangrikatna taria, namgipa gisik aro kakketgipa raio tikka su•na nangchongmotani aro draaniko mamingsaloba niam bidikko sandigenchim ong•oba nikna gita man•jawa, ong•jaode ultra vires ab initio (Latin) ine chanako man•gen ba niamko u•ie niamni kosako re•a ine chanskagen”.
Constitutional Rights Forum-ni President Greneth M.Sangma, kosako High Court-ni on•gimin raio pangchake nisusagrikengon tikkako drae su•na man•ja ba su•telna nanga ine ong•ja, indiba vaccination ba tikkani gimin songsalni manderangna agantalate on•china aro mande sakprakprakni raio tikka su•na sika aro sikgijao pangchakesa ja•ku de•na gita man•a ine janapataha.
CRF-ni President Meghalaya a•dokni Chief Secretary-na seatengon, chinga tikka aro government baksa maming neng•nikani dongja aro uamangni kosako maming dakeba re•ja, jean sal wal tikako su•na didiengachim. Chinga bisongni Corona virus-ko chel•chakna kam ka•ako demittela aro janggiko jokatna gita dingtang dingtang mikrakatani program-rangko ong•atanina jinmani palo rasongko on•a. Indiba Corona sabisina simsake ja•ku de•engon apsangrikani gisik dongna nanga aro ka•namgija sabisioniko chel•chakna Corona-ni Program ba vaccine drive-rangko ong•atengon, manderangko dragija basena cholko on•na nanga jekon Constitutional Rights of India an•chingna jakgitele janggi tangna aro chanchie basena cholko on•aha.
Bang•a dingtang dingtang songni manderang an•tangni neng•nikanirangko chingna parakaha aro Covid-o pangchake Officer-rangni drae kam ka•giparangni bimingrangko Constitutional Rights Forum parakatenga. Uaranga: CWMGC-ni Principal Dr. Meena A. Sangma aro Mendipathar Kolege-ni Principal, SGH-Chokpot-ni Sub-Divisional Officer Dolrich Momin, Gambegre-ni BDO aro gipin a•jani government office-rango kam ka•giparang chanchigija tikako drae talatchenggija ka•mikkenate su•aha aro Garo Hills-ni gipin biaprangoba tikka su•kujani gimin manderangko kal•gitchie ka•mikenataha. Bang•a manderangni tikka su•jani a•selara be•enni bako gipin sabisi dongani gimin ong•achim. Minggipinara song nokni manderang neng•nikani gnangchimgenoba tikka su•kugijagiparangna dakchakaniko on•naba jechakaha ine Greneth Sangma parakataha. Ia obostatangko nigrikatengon bang•a songrango tikkani gimin maming u•iatani gri aro mikrakatani program-rangko on•ja ine songni manderangoniko kobor man•aha. Uni giminsa bang•a manderang kenani ja•pangara tikkani gimin u•ijani a•sel ong•a aro iako gimaatani kamrang seoke tikatgimin manderangni jako kamko ra•e dilgiparangan ong•a.
Tikkako su•ani Program-ko dakengon Officer-rang manderangna mikrakatani kattarangko on•chenge dragija basena cholko on•na nanga aro songo noko ka•mikkenate neng•nikanirangko on•na nangja. Draanichi India Constitution-ni Article 14 aro 21-ko pe•a gita ong•enga aro niamni kosako re•aniba ong•a ine CRF-ni President re•anggipa Sombar salo Meghalaya sorkarini Chief Secretary-na badi ka•e lekka seataha.