Tura, July 16, 2022: A•chik Holistic Awakening Movement (AHAM)-ni President Georgeprince Ch. Momin, Rongkhon dollongko tarie on•china West Garo Hills a•jani Deputy Commissioner-na lekka sedoataha.
“Tura Rongkhon dollong nangana bate nosto ong•aha aro be•gruna gitik dake dongenga. Ia dollongko bang•a manderang salantion re•ruraenga. Ia dollongni obosta namgijako nike jolni manderang AHAM-na u•iataha. Uamangni u•iataniko man•soe, chinga dollongko nina re•angaha. Indake ua dollongko re•ange nion, ua je somoioba be•gruaigenok ine nikna gita man•aha. Bang•a skul, kolege, opis aro salantio ong•katenggipa manderang ia dollongko re•tokenga. Uasan ong•aigija Meghalaya gimikko ge•sa mangmang B.ed kolege-chi re•ruraenggiparang ia dollongkon ga•bate re•na nangenga. Uni gimin ia bolni dollongko ta•rake concrete dollongko rike on•na nangchongmota. Unbaksana dollong sepango donggipa rama sorokni obostaba namen namsrangjaha. Uni gimin jinmani namgnina chanchie dollongsan ong•aija, rama sorokrangkoba tarie on•na nanga” ine Georgeprince Ch. Momin janapataha.