Shillong, July 16, 2022: All India Trinamool Congress (AITC) Sukrobar salo, Shillong AITC party Office-o tom•aniko ong•atangaha.
Indake ia tom•anio AITC State Youth President Fernandes S Dkhar, NPP sorkariko matnangenba poraienggipa chatro chatrirangna aro skigiparangna maming namdapaniko ra•baa dongja ine MDA sorkariko jaksi otaha.
Meghalaya a•dokni Skotong Minister Conrad Sangma, Education-ko skanggipa mikkango dongchenggen ine aganachim, indiba ua SSA skulo skigiparangni dormaharangko on•chipgija donenga.
“Conrad Sangma an•tangtangni dolko pilak kamon ta•rakatna engine ge•gni donga ine aganaha. Engine ge•gni donga ine an•tangtangko agangenchimode ua maina indita bilsi a•dokko sason ka•oba skulo skigiparangni dormahako baridape on•na man•ja. An•ching Dr. Mukul Sangma-ni bilsi chet sason ka•aniko niatode gisik ra•atna man•a, ua sal somoirango an•chingni dilgipa Mukul Sangma skulo skigiparangna dormaharangko baridapate donangaha aro poraienggipa chatro chatrirangni namgnina chanchie kamko ka•angaha. Indiba da•o Conrad Sangma-ni sorkari bilsi 4 atha sason ka•genchimoba uamang changsaba skigiparangni dormahako baridapata dongja. Ua ku•sikchi katta chi•a chi•a aganne, Education-kon gamchatbate ra•gen ine aganprakaniara indin ong•gramaia” ine Fernandes S Dkhar matnangataha.
Ia tom•anio North Shillong-ni Block President Elgiva G Rynjah aro Rongrong elekka-ni MDC aro State Youth Vice-President Rinaldo K. Sangma-ba dongpae bakko ra•angaha.