Tura, August 13, 2022: A•dokni Skotong Minister Conrad Sangma August 12 tarik Sukrobar salo National Youth Day-ko manidilanga baksa Yess Meghalaya-ko a•bachengate on•angaha.
Indake apsan salo chadamberangna Youth Engagement through Empowered Youth Organisations (YESS)-ni ning•o chadamberangna tangka paisani cheque-rangko on•ne dakchakangaha.
Je chadambe dolrangan YESS-ni am•sandianiko ba nangnikaniko chu•sokatachim, uamangni dolna dakchakanirangko on•angaha. Indake lak 31 tangkarangko dol 61-sana suale on•angaha.
Unbaksana lak 3 tangkarangko, a•dokni sak 61 chadamberang jemangan bang•a kal•susaanirango bakko ra•e cheahachim uamangnaba suale on•angjolaha. Garo Hills a•jani sak 2000 chadamberang Tura Goverment Kolege Field-ona re•bae maniao bakko ra•angtokaha.
Meghalaya a•doko register ka•gimin ge 3000 Youth Club-rang a•dokni namgnina re•mikkange kamrangko ka•enga. Indake sorkarini dakchakanirangko man•na gita uamang an•tangtang Club-ni lekkarangko see uamangni dakna man•chisoe donenggipa kamrangni bidingo talate, sorkarini ra•chakaniko man•genchimode tangka gong lak 1 dakchakaniko man•gen ine parakangaha.
Pa Conrad Sangma tom•anio jinmana aganprakengon, “Yess-ni dakchakanichi Meghalaya a•dokni bang•a chadamberang a•dokko silroroatna aro tang•dodapatna kamko ka•angna cholko man•gen. Sorkari a•dokni bang•a Organization-rangna, Club-rangna aro Association-rangna Yess Meghalaya-ni gita dakchakaniko on•anggen” ine aganangaha.
Ia program-ko 2021 bilsio State Youth Policy-ni didianiko man•ne ia bilsio chu•sokate, International Youth Day-ni salo ong•atna cholko man•aha. Indake ia program-ni miksonganiara a•dokni pilak Association, Club, aro Youth Organisation-rangna dakchakani ong•a.
Je Youth Organisation-rangan Yess-o bakko ra•angahachim, uamang bang•a kamrang jekai Environmental Protection ba samtangtangni Buring bolgrimrangko ripingani, workshop, financial literacy workshop, campaign, awareness dissemination workshop, career counseling, guidance workshop, clinic, mental well-being seminars aro dingtang dingtang kamrango bakko ra•anggen.
A•dok sorkari Meghalaya a•dokko India a•songo nambatsranggipa dam 10 a•dokrango biming dongatpana rakbee kamrangko ka•enga.
Yess Meghalaya-ni bidingo talbate ma•sina sikgenchimode, http://www.yessmeghalaya.in/ chi napange u•ie ra•na gita man•gen ineba aganangaha.