Tura, Mar 29, 2023: Matburingrangko donram biap Tura Nehru Park-o balgitchak mangsani siako March 27 tarik attamo nikaha. Nehru Park-o donenggipa matburingrangko name nirok simsakjani a•sel aro berarangko namedake kadule rakkijani a•sel matburingrang joke katengaha ine parakaha.
Maini gimin Nehru Park-o dongipa balgitchak siaha, namedake sandianiko dakgen ine DFO Rupanker Marak parakataha.
Da•ororo Nehru Park-o rona re•anggipa manderang, matburingrangko nikna man•jaha, maina matburingrangko nirokgipa dongjani a•sel Nehru Park-ni bang•a matburingrang gimaangengaha ineba parakaha.
Unbaksana, berani ning•o donggipa matburingrang ding•kario chi ringna man•jae, mongsonggipa matburingrang dongjaha, bera kadulgimin ning•ao peru mangsakosan nikna man•aiahachim.
“Nehru park-o matburingrangko nirokgipa dongjani a•sel ding•kario bera kadulgipa gringni ning•o ran•krakpilachim” ine matburingrangko nina re•anggipa manderang parakaha.
Matburingrangko donenggipa gring ba silchekchi kadulgipa berarang gimikan namjaha aro kadulgimin silchekrang tang•one nosto ong•aha.
Silchek-ko bera kadule dongipa matchok gimaaha, ki•singrang dongjaha, uni sepango donggipa bera kadulgimin gringo peru mangsa mangmang dongaiaha, unaba chi ringna on•gija donenga ine nina re•anggipa manderang parakaha.
Bera kadulgipa gringni nokking gimikon bol bijakrang ga•akdape pindapahani gimin salni teng•ako man•jaha.
Tura town-oni adita chel•ao matburingrangko donenggipa Nehru Park-ona chuttini somoio bang•a manderang matburingko nina re•angronga, indiba simsakgija donani a•sel matburingrang Nehru Park-o dongjani gimin nina re•anggipa manderang suk ong•gijaniko parakaha.