Shillong, April 24, 2023:Tura-o Winter Capital-ko dabianiara kakket ong•a aro Tura Megjalaya-ni gnigipa Winter Capital ong•na kraa ine a•dokni Skotong Minister Conrad Sangma aganchakani ja•man, Gambegre-ni Congress MLA Saleng A.Sangma-ba iana ja•ku de•aniko sorkari ra•chakna nanga, jedakode mikkangchi Garo Hills-o namroro silroroanirang tang•dogen ine janapdapataha.
Tura-ko a•dokni Winter Capital on•china Garo Hills-ni dolsa, A•chik Conscious Holistically Integratef Krima (ACHIK)-ni dabie seatgipa lekkako janapa gita, Skotong Minister, ia dabiani ong•chongmota, skangonin Tura-o Winter Capital-ko songna ku•rachakgimin donga ine aganchakataha.
ACHIK Organisation-ni Tura-o Winter Capital-ko songchina ja•ku de•aniara Garo Hills-o apsangrik development-rangko man•pana aro pilak sason ka•anirangko bilakdapatna miksongani ong•ani ong•a. Maina dal•dalgipa Office-rang, bil gnanggipa Officer-rang aro sason ka•anirangna Shillong-osan dongaiani gimin, uandakgipa pilak kamrang aro bilrangko Garo Hills-oba man•pana nanga ine dabiani ong•enga.
Iani bidingo Congress MLA Saleng A. Sangma songbad setimgiparangna aganengon, Tura Winter Capital-ko songanichi darangnba neng•nikani ba namgijani dongja. “Jedakode adita development-ni kamrangko sualgrike ka•na man•gen” ine agandapataha.
Apsandake, Jaintia Hills-koba ‘Summer Capital’-ko songna ba donna man•gen ineba Saleng Sangma aganaha.
Jensalo Meghalaya a•dokko 1972 bilsio man•ahachim, skanggipa Assembly Session-o gitcham dilgiparang, chanchie, jadok Shillong-o aro jadok Garo Hills-o Meghalaya Assembly-ni tom•bimonganiko ong•atna, Shillong aro Tura-ko Meghalaya-ni skotong songjinma ba Capital songna tik ka•e ra•chakgimin ong•a. Indiba da•alona kingking, gitcham dilgiparangni tik ka•anggimin Tura Winter Capital-ko chu•sokate on•kuja. Uni gimin ia dabiani gital ong•ja, skangoni tik ka•e agreement-o ra•chakgimin, Tura Winter Capital ong•a. Indiba da•alo, ACHIK organisation-ni gisik ra•atpiltaianiara gualani dongja, Tura-o Winter Capital-ko donna krachongmota ine Saleng A.Sangma agan-ku•pattidapataha.