Tura, September 14, 2022: BJP Tura District Committee-ni dilgiparang ma•mongni BJP National General Secretary BL Santosh-na lekka sedoataha.
BJP Tura City District Committee-ni janapatani gitade, West Garo Hills a•jani dam dok elekkarang jekai North Tura, South Tura, Dalu, Rangsakona, Dadenggre aro Gambegre elekkani dilgiparang apsan ku•monge lekka sedoataha.
“BJP Tura District Committee-ni membor-rang rakbee kamrangko ka•enba Bharatiya Janata Party (BJP) dolko a•jani kona noksik gimikchin gipataha. Indake bang•a manderang BJP-ni kamrangko aro miksonganirangko ra•chakna a•bachengtokaha. Narendra Modi-ni BJP dolko rikdilanichi BJP dol Garo Hills-oba bang•a manderang ra•chaktokaha ine nikna gita man•a. Indake batanggimin bilsini GHADC eleksino, BJP dolni dilgipa Bernard Marak chegipa ong•aha. South Tura elakka Skotong Minister Conrad Sangma-ni elekka ong•genchimoba, Bernard Marak GHADC eleksino uni elekkao chegipa ong•skaaha. Indake GHADC-o BJP MDC-rang sakgni gnang, uamanga Tura elekkani Bernard Marak aro Dalu elekkani Pramod Koch ong•a. BJP dolni State Vice President aro MDC Bernard Marak-ni re•mikkangdilanichi ma•mong sorkarini Garo Hills-na sokatgipa bang•a scheme-rangni bidingo jinmana talate on•aha. Bernard Marak corruption-ko namnikgijagipa saksa ong•a. Indake ua a•dok sorkarini Garo Hills-ona sokatgipa scheme-rang jekai JJM, PMAY, SWATCH BHARAT, GARIB KALYAN ANNA YOJANA aro uandakgipa scheme-rangni tangkarangko a•dok sorkari jakkalsretani bidingo jinmana parake on•angaha. Bernard Marak-ni kam ka•anirangko nike aro uni corruption-ko jegale kakketna re•mikkanganiko nike, Garo Hills-ni bang•a manderang uko namniktokaha aro uni kamna kusi ong•e, BJP dol Garo Hills-ni kona noksik pilakchin ta•rake gipangroroaha. Uni kakketna dakgrikaniko nike aro kangal cholgri manderangna mikkang nitegija ka•saaniko nike bang•a manderang BJP dolo naptokaha aro Bernard Marak-an Garo Hills-o niksengbatgipa BJP dolni dilgipa ong•ahachim, ua South Tura elekkao, Skotong Minister Conrad Sangma baksa susana ka•dongsoengachim. Indiba dikdiksa somoini gisepon uni dal•lang chuanganiko aro manderangni ra•chakaniko nike, a•dokko chalaienggipa sorkarini manderang uko ong•gijagipa mamlao ban cha•ataha” ine BJP Tura City District Committee-ni President Daulat Chada Marak aro General Secretary Wilver Graham Danggo janapataha.
Uni gimin, “Chinga Tura BJP dolni dilgiparang ma•mong sorkarini dilgiparango, Bernard Marak-ni mamlako jakgittele ba independent inquiry-ko dakna raiko on•china aro pattokoniko ta•raken jamin ba bail-ko man•na dakchakaniko on•china mol•molna sika, jedakode chinga manderangni tol•gramanichi nosto ong•gimin bimingko reppie gital ong•atpilna man•gen” ineba janapataha.
BJP Tura City District Committee-ni dilgiparang re•baenggipa 2023 bilsio Bernard Marak-ko South Tura elekkao BJP dolni gita eleksino susaaniko nangnikenga. Uasan ong•aigija BJP dolni State President Ernest Mawrie-koba uni term matchotja dipetde a•dokni President ong•e dolko re•dilangkuchina mol•molangjolaha.