Williamnagar, April 12, 2022: East Garo Hills a•jani Loyala College-ni Political Science Department, Traffic Rules aro Road Safety ni bidingo mikrakatani program-ko April jani 9 tarik o Bishop Mama Hall o ong•atangaha.
Ia mikrakatani program-ko ong•atani miksonganiara rama rango gari salgipa, cycle salgipa aro ja•achi re•gipa manderangna Traffic ni niamrangko u•iatna agantalate on•angan baksana Students Against Driving Drunk (SADD) ni gimin jinmana u•iatna miksonge ong•atangaha.
Ia program o EGH a•jani SI aro Traffic Incharge, Goera T Sangma bakko ra•anggenba “Sorok rango gari rangko salon aro ja•achi re•on pilakan Traffic ni niam rangko ja•rikna nanga. An•ching a•dok o bang•a accident rang ong•aniko nikna gita man•a ian an•chingni simsakgijani aro Traffic Rules ko ja•rikjani a•sel ong•a. Traffic Rules ine aganon ian Gari salgipa rangnasan ong•aigija indiba ja•achi re•gipa pilak manderangnaba ong•a. Motor Vehicle Amendment Act 2019 o janapani gitade gari salon seat belt ganna nangchongmota, gari salon Phone o golpona nangja, helmet ko ganna nanga ine sea gnang. Uni gimin an•ching pilak chadamberang gari salon ba ja•achi re•on Accident ong•a oni naljokna Traffic Rules ko ja•rikna nangchongmota” ine Goera T Sangma aganaha.
Ia tombimonganio Political Science Department ni HOD Imti Lemtur rimchaksoani kattarangko agansoaha, Political Science Department ni chatri Neckwestha N Sangma rama rango ong•ronggipa accident rangni bidingo agantalatangaha. Unbaksana apsan Department ni Bartholomeo R Marak, National Road Safety Policy ni bidingo agantalatangaha aro bon•kamao Alprin R Marak mittelpilani kattarangko agane ia tombimonganiko matchotataha.