Williamnagar, Feb 1, 2023: Williamnagar-ni MDC aro TMC candidate Alphonsush R Marak, TMC dolni office-ko oprakani somoio mandean dongja ine Marcuise N. Marak-ni matnange agangipa kattako raken jegalataha.
“TMC office-ko nokdonggae on•miting somoio, darangba dongja ine Marcuise Marak-ni matnanganiara an•tangko kracha•aniona ga•akatasan ong•aia. Dr Mukul Sangma-ni TMC Office-ko oprakmiting somoio hajalni hajal manderang bakko ra•aha. Bang•a manderangni bako ra•aniko chinga sakki on•na man•gen. Marcuise Marak an•tangni kosako susaaniko nirikite roani pal an•tangni kamrangko name ka•angon nambatgen” ine Alphonsush Marak agansatskaha.
Uandake tol•gramanichi mamingkoba man•dapjawa, indiba doltangni manderangkosan gimaatani ong•aia ineba aganangkuaha.
“Ua an•tangni manderango ka•donganiko gimaatenga ine niksona man•a aro gipin dolni bidingo tol•am tol•doe manderangna aganprakani maming sakki gri gipin dolrangni bidingo nirikkote agananisa ong•aia” ine Alphonsush Marak jegalataha.
“Chinga TMC-ni dilgiparang a•dokna aro a•dokni manderangna ka•sae kamrangko ka•na ku•mikchetaha aro chinga ku•mikchetatangko chu•sokatgen.
Manderang chingko tol•e matnanggenchimoba, chinga an•tangni dakna nanggni kamrangko ma•sia. Chinga TMC-ni dilgiparang jat aro a•songna ka•sae kamko ka•anggen” ineba Alphonsush Marak agandapataha.