Shillong, February 1, 2023:RTI Activist Disparsing Rani-ni Sombar salo parakatani gitade, Covid-19 sabisina kamrangko ka•na, National Health Mission-ni gita ma•mong sorkari grants-in-aid-na gong kror 119-ko on•ataha, indiba gong kror 119-oni gong kror 47 tangkarang gimaenga ine koborna parakataha.
Disparsing Rani, kobor ra•timgiparangna aganengon, “RTI ka•anio ma•aiani gita, Ministry of Health and Family Welfare, Meghalaya a•doko Covid-19 sabisiko sanna gita skanggipa phase-o tangka gong kror 5.61-ko on•ataha, indake, gnigipa phase-o gong kror 104.12 tangkarangko on•ataha. Indiba, iani bidingo Health Minister James Sangma-ko batanggimin budget session-o gitcham MLA Adelbert Nongrum-ni sing•anina, gong kror 76-kosan ma•mong sorkari on•ataha ine aganchakaha. Indide RTI ka•anio ma•siani gitade, James Sangma tol•e sessiono aganchakaha” ine aganaha.
“Gong kror 76-kosan ma•mong sorkari on•ataha ine Health Minister James Sangma aganaha. Indiba hisap ka•na man•gijagipa, tangka gong kror 47 gimaenga. Indide, James Sangma ua tangkarangko an•tangni namgnina jakkalaha” ineba RTI Activist parakaha.