Shillong, January 24, 2023: Meghalaya Trinamool Congress (TMC) Monggolbar salo sorkari rikna cholko on•genchimode, sal 100-ni gisepon ming 10 ku•mikchetenggipa kamrangko chu•sokate on•gen ine parakataha.
Meghalaya a•doko ming 10 mongsonggipa kamrangko TMC sorkari rikode ka•gen ine Abhishek Banerjee parakatengon, “Chinga TMC-ni dilgiparang Meghalaya a•dokko tang•doatna kamrangko ka•anggen. Education aro Health Sector-ni dingtanganiko nikna gita man•gen. A•dokni Economy-ba tangdodapgen. A•dokni manderang an•tangtangni rights-ko naljoke rakkina kamko ka•gen. Ia kamrangko ka•na skang jinmani raiko ra•gen ” ine aganangaha.
TMC ia kamrangko ka•na ku•mikchetengon, ku•sik mangmangchisan ong•ja, indiba ku•mikchetanirangko chu•sokatna krenge kamrangko ka•enga. TMC 2023 bilsio sorkari rikna cholko man•ode, sal 100-ni gisepon ku•mikchetatangko bimang pil•ate mesokgen ineba agandapangaha.
Shillong songjinmao donggipa Pinewood Hotel-o miksonganiko parakatengon, MP Derek O’Brien, a•dokni Incharge Manas Bhunia, President Charles Pyngrope, warachakgipa dolni dilgipa Dr Mukul Sangma, Vice President George B Lyngdoh aro sak 28 TMC candidate-rang bakko ra•angaha.
TMC dilgiparangni ming 10 miksonganiranga Economy, Women Empowerment, Youth Empowerment, Social Security, Farming, Healthcare, Education, Civic Amenities, Tourism, Sports, Music aro Culture-ko mikkango donne kamko ka•anggen.
Charles Pyngrope jinmana aganprakengon,
“Meghalaya a•dokko tang•doatna aro dingtanganiko ra•bana bang•a manderang TMC-o pangchake ka•dongenga. A•dokni manderang chingna ka•saaniko on•aha, jeni a•selan chinga da•o indakgipa gadangona sokdona man•aha. A•dokni bang•a manderang salantian chingni kam ka•anirangko nangnike chingona re•baenga. Gitcham sorkarini galchipako man•ne, an•chingni a•dok andalgripaha, indiba TMC dolo ka•donge chingna ka•saaniko mesokgenchimode, chinga andalgipa a•dokko jasengatpilgen” ine aganaha.
Dingtanganiko ra•bana kam ka•anirangko nike a•dokni bang•a manderang TMC baksa bakrime kamrangko ka•enga. TMC dilgiparang tom•aniko ong•atesa apsan chanchie mongsonggipa dakgni kamrangko ra•gataha. Sorkari rikna cholko on•genchimode, re•baenggipa bilsi 5-o TMC a•dokni Gross Domestic Product (GDP)-ko tang•doatna kamko ka•anggen. Una agreba, MSME Unit-ko da•o donggipana chang bri bate tang•dodapatna kamrangko ka•angen. Inadke bilsi 5-ni gisepo lak 3 kamrangko bikote, a•dokni poraia matchote kam gri roenggipa chadamberangna kamko on•gen. A•dokni ma•gipa ba me•chikmarangna japrako gong 1000 tangkako account-o chipe on•anggen. Apsandaken bilsi 21-oni 40-ona ong•gipa chadamberangnaba japrako gong 1000 tangkarangko account-o chipe on•gen. Chadamberangni poraianio dingtanganiko ra•bana gita Higher Secondary aro Kolej-o poraienggipa chatro chatrirangna laptop-koba sualgen ine Dr Mukul Sangma aganangskaha.
“A•dokni manderangna dingtanganiko ra•bana ku•mikchetengon, chinga bimang pil•ate on•gen. Tourism sector-o chinga manderang baksa agangolpogrike sorkario register ka•gimin, Job Card-ni gita japrako gong 2500 tangkarangko honorarium ba mitelpilani dake on•gen. Iako dakna bilsi prako tangka gong kror 75-ko nanggen” ineba aganangaha.
“Salanti jakkalenggipa bosturangni dam barianiko nike, chinga Social Welfare Pension-ko gong 1000-ona tang•doate on•gen” ine Abhishek Banerjee aganaha.
Meghalaya UNITE, Meghalaya Unorganised Sector Training and Empowerment Scheme-ko ra•gate, sak lak 2 manderangna skill training, free healthcare, term life insurance-rangni bidingo skie on•na gita miksongenga.
PDS Beneficiary-rangko bariatna gitaba TMC a•ja ge•antion sandianiko dake ba resurvey ka•e, e-ration card-ko sualtaina ku•mikchetaha.
A•dokni chadamberang poraianio dingtanganiko ra•bana, sorkari skulo napenggipa bi•sarangni ma•a pana bilsi prako gong 1200-ko on•gen ineba parakataha.
Meghalaya a•doko dam 6459 songni ramarangko black topping on•gen ineba aganaha.
Una agreba A•chik aro Khasi ku•sikko a•songni 8-gipa Schedule-o napatna gita kamko ka•gen ine parakataha.