TGCSU-ba Tura-ko Winter Capital songchina dabienggipa dolrangna chakpaaniko parakata  

Tura, April 25, 2023:Garo Hills-ni dingtang dingtang dolrang Tura-ko ‘Winter Capital’ songchina dabiengon, Tura Government College Students’ Union (TGCSU)-ba chakpaaniko parakataha.

TGCSU-ni President Te Anand Ch Momin-ni parakatani gitade, 1972 bilsio Meghalaya a•dokko man•chenganin, Tura-ko Winter Capital songna a•dokni gitcham dilgiparang songgigrike donangahachim, indiba da•alona kingkingbaTura-ko Winter Capital-ko chu•sokate on•kuja. Tura-ko Winter Capital songaniara, Meghalaya a•dokko man•na dakgrikdilanggipa pagitchamrangni jumangko chu•sokatani ong•achim.

Tura-ko Winter Capital songe on•kujaengani a•selsa a•dokni mongsonggipa jatgittam manderangni gisepo meli-nangrimgrikanirang dongjaenga aro jatsa jatgipin-ni kosako ding•chaogrikani ong•enga ine janapataha.

A•dokni gipin mongsonggipa jatrang, Garo Hills-ni gimin ba A•chik jatni janggi tangani aro daka rikani dakbewalrangko namedake ma•sitokkujaengani giminsa iandakgipa obostarang ong•enga ineba TGCSU-ni President parakataha.

Pagitchamrangni jumang niksoe dilgiparangni gisepo songgigrikangani gitade, Tura-ko Meghalaya-ni gnigipa ba Second Capital songna krachongmota. Uni gimin Tura-ko October jaoni March jaona gnigipa ba Second Winter Capital songna nangchongmota. Indake ong•engon, ia dabianiko chu•sokatkuja dipetna TGCSU-ba Tura-ko Winter Capital songchina dabienggipa dolrang baksa bakrimangpagen ine parakataha.