SWKH-o mikka balwa rakanichi bang•a nokrang nosto ong•e, nok jam gri ong•toka
Mawkyrwat April 16, 2022: Sukrobar walo mikka balwa rakan baksa stil bilongbee ga•akani a•sel South West Khasi Hills a•jani Rangasora jolrango bang•a nok jamrang nosto ong•ako man•aha ine kobor man•aha.
Koborni gitade, Rongasora jolo komibeoba nok te 19 chu•gimik nosto ong•aha aro nokdang ge 38-na bate adita nosto ong•ako man•ahachim.
Ua jolni manderang nok jamrang nosto ong•ani a•sel neng•nikaniko man•tokenga. Uni gimin nok jam dongjae manderang sorkarini dakchakaniko nangenga ine parakataha. Uasan ong•aigija Meghalaya a•dokni dingtang dingtang songrangon bang•a nok jamrang mikka stil ondape nosto ong•ako man•aha ineba u•iataha.
Duko ga•akenggipa manderangna sorkari maiba dakchakaniko on•genchimode, songni manderang mittelbegenchim ine parakataha.