Ampati, October 21, 2022: Meghalaya Trinamool Congress (TMC) a•dok gimikchi gipatna aro bilake kamrangko ka•angna miksonge, Bristibar salo South West Garo Hills a•jao District Mahila Committee aro Ampati Block Mahila Committee-ko songaha.
Indake Committee-ko songanio Salmanpara elakkani TMC MLA Winnerson D Sangma aro Mahila Pradesh Trinamool Congress-ni President Selma D Shira bakko ra•angaha.
Jinmana aganprakengon TMC MLA Winnerson D Sangma, “An•chingni a•dok sorkari bang•a changon an•chingko cha•bokenga. South West Garo Hills a•jani dam gittam elakkao donggipa manderang ia tom•aniona re•bae bakko ra•anian, MDA sorkario ka•dongani dongja ine mesokani chin ong•a. Dr. Mukul Sangma-ni re•dilanichi an•ching re•baenggipa bilsio namgipa sorkariko riktaipilna niksamsoenga” ine aganangaha.
Trinamool Congress State Mahila President Ma. Selma D Shira, “Anga TMC dolona napbagipa gital membor-rangko dingtangmancha mittelna sika. TMC dolo donge kamrangko ka•anichi an•ching a•dokna bang•a dingtanganirangko ra•bana gita chol ong•gen ” ine aganangaha.