Shillong, July 22, 2022: A•dokni dakchakgipa skotong minister Preston Tynsong, Bristibar salo Education Minister Lakhman Rymbui-ni dongpanio High Level tom•aniko ong•ate, wal sal dakenggipa SSA skigiparangna ja 4-ni dormaharangko mikkang antio ong•gnok ine parakataha.
Preston Tynsong-ni parakatani gitade, Ma•mong Sorkari, a•songni dingtang dingtang a•dokrangna fund-rang aro grant-rangko somoi gita watatna man•jani a•sel a•dok sorkariba SSA skigiparangna dormaharangko on•na man•jaenga. Indiba, “Chinga ka•donga ma•mong sorkari baksa skotong minister aro anga chanchianiko dake skigiparangni dormaharangko jaanti on•na man•jaoba, jagittamprako watatchina ma•mong sorkariko mol•molanggen ine Tynsong SSA skigiparangna ku•rachakataha.
Uni gimin, na•simangni jingjengataniko dontonge, kamtangtangko ka•angpilchina Tynsong SSA skigiparangko mol•molangaha.
SSA skulo skigiparang a•dokni dakchakgipa skotong minister-ni ja 4-ni dormaharangko on•chenggen, uni ja•mano jasaniko on•taigen ku•rachakani gimin SSA skigiparang jingjengataniko dontongate, mikkang antiona senggen, uni ja•mano chanchirimaniko daktaigen ine MSSATA-ni padot parakataha.