Speaker, Saleng Sangma-ko Assembly-o kragija kattarangko aganjachina mikkrakata

Shillong, September 13, 2022: Assembly-ni Speaker Metbah Lyngdoh Monggolbar salo Gambegre elekkani MLA Saleng A.Sangma-ko Assembly House-o kragijagipa kattarangko jakkaljachina mikkrakatangaha.

“Assembly-o Saleng Sangma-ni jakkalgipa kattarang aro uni bewalrangara ra•chakna amgijagipa ong•a. Uni gimin, mikkangchi apsan bewalko jakkalangtaia ong•ode, uni kosako ja•ku de•anggen” ine Speaker Metbah Lyngdoh aganaha.

MLA Saleng Sangma, Assembly Budget Session-o rama namgijani bidingo, traffic management transport-ni niamko ja•rikjani gimin aganangaha, jeon ua bang•a kragijagipa ku•rangko ba Unparliamentary kattarang (Words)-ko ra•chape aganahachim.

Saleng Sangma-ni Assembly-o kragijagipa kattarangko jakkalaniara skanggipa chang ong•jaha, ua bang•a changon indakgipa kattarangko jakkalronga ine Lyngdoh aganaha.

“Assembly House-o mande ra•e, uano bakko ra•enggipa pilak membor-rang nama kattarangko jakkala. Uni gimin Unparliamentary kattarangko jakkalaniara kraani ong•ja aro ra•chakna man•gijani ong•a” ineba ua agandapangaha.