Tura, Sept 26, 2022: Re•anggipa adita salna skang mande saksa Zizak C&RD Block-ni Assistant Program Officer (APO) saksako phone ka•e kragija kattarangchi dagrange manengatgipa kattarang Social Media-rango giproroaniko bang•a manderang niksoe matnangahani gimin, NPP Block Vice President, Lenus Rema Marak-ko NPP doloniko ra•galaha ine NPP-ni District President Linekar K.Sangma parakataha.
Matnangako man•gipa NPP Block-ni Vice President, Zikzak C&RD Block-ni APO saksako kragija kattarangchi dagrange phone gita rakgipa kattarangko aganate, APO-ko kam ra•jitangna ka•mikkenatahachim. Lenus Marak, NPP dolo pangchake an•tangni bilko ong•gija jakkalanichi dolna namgija bimingko ra•baha.
Ua phone ka•e kragija bewalchi sorkari official saksako dagrange manengatgipa kattarang social media-rango giproroangani ja•man bang•a manderang Lenus Marak-ni kosako raken jegalattokaha.
Indake uni namgijagipa bewalko NPP dilgiparang raken jegalataha aro uko kamoni ra•galaha ine district-ni NPP president Robibar salo songbad setimgiparangna u•iataha.