Shillong, September 26, 2022: A•dokni Skotong Minister Pa Conrad Sangma, Sombar salo Shillong songjinmao donggipa Yojana Bhavan-o ong•atanggipa, Early Childhood Development Workshop-o bakko ra•angaha.
Conrad Sangma Meghalaya a•dokko a•song gimiko nambatsranggipa a•dok dam 10-ni gisepo biming nakatatna rakbee kamrangko ka•enga ine aganangaha.
“Gimik kamrangan nangdimgrika. A•dok sorkari bang•a Self Help Group-rang, game ge•e cha•giparang aro chadamberangna dakchakanirangko on•enga. Iako dakanichi an•chingni a•dok tang•dorikrikenga aro miksongatangko chu•sokatna re•mikkangenga. Early Childhood Development Program ian ge•sa a•song gimiko Pioneer Program ong•a aro ia program-ko bang•a a•dokrangon ja•riktokenga” ine Pa Sangma aganangaha.
Early Childhood Development ian ge•sa dal•drobaenggipa chadamberangna mikkangchi re•chakatna skianiko on•a. Ia program-ko bimang ong•atna rake kam ka•gipa pilak Department-rang aro Field Worker-rangko ua mittele aganangaha.