Tura, May 12, 2022: West Garo Hills a•jao Solid Waste Management-ni bidingo tom•aniko ong•atangaha.
Ia tom•aniko May 11 tarik Budbar salo DRDA Conference Hall-o ong•atangaha aro ia tom•anio bang•a Local Development Committee-ni President aro Secretary-rang bakko ra•angtokaha.
West Garo Hills a•jani Deputy Commissioner Ram Singh, Local Development Committee-ni kamrangko demittelle aganangan baksana jobolrangko chiringrango, bangbanggipa biaprango skatang galgija Municipality-ni on•gipa jabol chimongrang kalbong ba Dustbin-osa galchina didiangaha.
DC tom•bagipa manderangko Municipality-ni ra•gatgimin niamrangko ja•rikchina didiangaha.
“Chinga Waste Management-ni bidingo changni chang tom•aniko ong•ate chanchirimaniko dakaha. Chinga Rongkhon Songgital-o donggipa jabol galram ba Dumping ground-o Refuse Derive Fuel Plant (RDFP)-rangko rikani bidingoba chanchiangaha. Waste management-ko nok ge•antion ja•rikna gita nanggen. Jrongaigipa jabolrangko tangsim rongni garbage bag aro jronggijagipa jabolko gisim rongni garbage bag-o chipe galna gita man•gen. Garbage bag-ko Municipal office-oniko man•gen. Ia ge•etaniko National Green Tribunal (NGT)-ni gita on•aha. Iako an•ching sakantian ja•rikna gita nanggen. skanggipa phase-ko Upper Chandmary, Lower Chandmary, Forestilla, Ringrey Gittim, Akonggre, Ringrey, Gandrak stretch, Wadanang, Jangga, Alotgre Stretch, Lower Mission Compound, ITI jolrangoni a•bachengatgen. Local Development Committee-ni manderang iarangni bidingo gittimni manderangna mikrakataniko on•angna gita man•gen. Uamang jabolrangko sorok a•samrango galgija joljol truk gariosa galna gita nanggen” ine TMB-ni CEO Rikse R.Marak agan talatangaha.
Uasan ong•aigija Refuse Derive Fuel Plant-ko Korean Company-rangsa rikenga aro iako re•baenggipa May 17 tariko a•dokni Skotong Minister Conrad Sangma aro Korean Ambassador jinma oprake on•anggen. Tura songjinma salantio ton 35 jabolrangko ong•katatenga. Fuel Plant-ko matchote kam a•bachengatani ja•mano ia jabolrangko energy block-rangko aro fuel-rangko tarina jakkalangskagen ineba CEO agandapangaha.