Sohiong, April 17, 2022: Meghalaya a•doko Trinamool Congress (TMC) dolko apalbatatna aro bilakbatatna miksonganio April 16 tarik Sonibar salo tom•aniko ong•ate, Sohiong Block Trinamool Congress Committee (SBTCC)-ko songaha.
Ia tom•anio Meghalaya TMC-ni Vice President James Lyngdoh, Meghalaya Trinamool Students Congress-ni President Bansharai Pyngrope, Sohra Block Trinamool Congress (SBTMC)-ni President Iohdorlnag Diengdoh, Nongstoin Block Trinamool Congress (NBTMC)-ni President Macmillan Kharbani aro bang•a dingtang dingtang TMC-ni dilgiparang dongpae bakko ra•angaha.
Unbaksana tom•anio Committee-ko songe sak 16 Committee Membor-rangoni Stodingster Thabah-ko President aro Dinestar Rani-ko General Secretary-na seokangjolaha.”Chinga Meghalaya-ni kona noksik gimikon TMC-ko bilakatna raken kamrangko ka•anggen. Chinga songni manderangko gronge, chingni dilgiparang baksa agangrike songni manderangna agan talate, TMC-ni miksonganiko aro niksamsoe kam ka•gnirangko agan on•anggen. Meghalaya a•doko chingni TMC-ko bikotani mongsonggipa ja•pangara manderang baksa ku•monge TMC-o bakrimenba bilake BJP-ni kosako dakgrikanian ong•gen” ine gital seokako man•gipa President Stodingster Thabah aganangaha.
Skie ra•ani bidingo talatangengon, mongsongbate kam gri dongenggipa chadamberang aro poraianiko dontonge skul napgijagipa chadamberang inditan a•doko tang•doenga, maidkode kam gri dongenggiparangna nam cholko dake on•na man•gen aro skul napgija donggipa chadamberangko maikai skulo poraiatpilna man•gen, iarangni gimin rakbate ja•kuko de•anggen ine Bansharai Pyngrope ka•dongatani kattarangko aganangaha.
Una agreba Sohra Block Trinamool Congress-ni President Iohdorlnag Diengdoh TMC-ni mikkangchina niksamsoani aro kam ka•gnirang (vision and mission)-ko jinmana talate on•angskaha.
Indake ong•engon, gital seoka man•gipa Committee-ni dilgiparang mikkangchi Meghalaya a•dokni kona noksikrango TMC block-rangko bilakatna kam ka•ani TMC-ni jako ong•a ine Meghalaya TMC-ni Vice-President James Lyngdoh ka•dongani kattarangko aganangskaha.