Skotong Minister Dalu Civil Sub Division aro Purakhasia C&RD Block-ko do•ga oprake on•anga
Tura, December 1, 2022: Meghalaya Sorkari a•dokko aro songrangko namroro silroroataniko ra•bana krenge kamrangko ka•engon, Bristibar salo Skotong Minister Pa Conrad K Sangma South West Garo Hills-o Purakhasia C&RD Block-ko, West Garo Hills-o Dalu Civil Sub Division-ko oprake on•angaha.
Uandake songo noko pangkamgipa janggi tangani cholrangko on•na gita jilla-kaanirangko suale on•angjolaha. Gital
Purakhasia C&RD Block-ko oprake on•angengon, “An•ching Purakhasia C&RD block-ko oprake on•na man•ani gimin, anga namen kusi ong•a, maina ia gital block-o songdongenggipa manderangna bang•a bilrangko on•na man•gnok. Ian manderangni janggi tangani cholrangko namdapatani ong•gnok. Unbaksa, manderangna namgipa sason ka•aniko sepangbate ra•bana, chinga dontonggija kam ka•e, da•alo C&RD Block-ko South West Garo Hills a•jao oprake on•aha” ine Skotong Minister aganangaha.
Unbkasana, Dalu Sub Division-ko oprake on•angmitingo, “Ian sorkarini chalaianiko manderangona sepangbatatgnok, mongsongbate ia biaprango jerangan dingtangmancha nirokataniko nangenga.
Una agreba mande ra•ako man•na kragipa Skotong Minister, ‘FOCUS+’-ni gita Farmers’ Welfare Program-ni ning•o ge 3634 Produced nokdangrangna tangkarangko sualangaha. ‘FOCUS+’ko Meghalaya a•dokni pilak game cha•giparang ba producer nokdangrangna namgnirangko on•na gita tariaha. Ian Meghalaya-o game cha•giparangni dal•batgipa welfare program ‘FOCUS’-ni (Farmers’ Collectivization for Upscaling Production and Marketing System) bak ong•a. Ia ge•gni scheme-rang (Focus aro Focus+) Meghalaya-ni game cha•gipa nokdangrangna nokprako gong 10,000 tangkarangko on•ne namgnirangko ra•bagen.
Una agreba, Rural Backyard Piggery Scheme, ‘PROGRESS’-ni ning•ao, mang 1200 wak bi•sarangko (bima mang-4, bipa mang-1)-ko South West Garo Hills a•jani ge 300 game cha•gipa nokdangrangna sualangaha. Ia ‘PROGRESS’ Scheme, dingtang dingtang jilla-kaani kamrangko ka•e aro game cha•giparangna pangkamgipa janggi tangani cholko on•na gita miksongani ong•a. Ia Scheme sak 10,000 cholgri-apgrigipa game cha•giparangna dakchakaniko on•enga aro iana agreba, a•doko wak aro do•o be•enrang man•aniko bariatna jotton ka•ani ong•a. Iana agreba, Kuroiler do•orangni high yielding variety-ko sak 100 manderangna sualataha aro ge-6 IVCS-rangna (Integrated Village Cooperative Society)-rangna sin•karini me•su bitchilrangko suale on•angjolaha.