Skotong Minister chang 19-gipa CCS Foundation day-ko maniani salo bak ra•anga
Tura, September 25, 2022: Meghalaya a•dokni Skotong Minister Pa Conrad Sangma, Sonibar salo College of Community Science (CCS)-ni chang 19-gipa Foundation Day cum Annual Kolege Week-ko maniani salo dongpae bakko ra•angaha.
College of Community Science, Central Agricultural University September 24 tariko District Auditorium, Tura-o maniangaha.
Skotong Minister Pa Conrad Sangma jinmana aganprakengon, “College of Community Science angni pagipa Purno Sangma-ni gamchatgipa mingsa gam ong•a. Ia kolege pilak chadamberangna bang•a skidapanirangko aro namdapaniko ra•bae on•aha” ine aganangaha.
Pa Sangma ia kolege-oni pass ka•angipa pilak chadamberangna uni nama skanirangko on•angan baksa poraienggipa chadamberangko uamangni mikkangchi poraianio name dakangchina didiangaha.
“College of Community Science, Grassroot level-onin kamrangko ka•doa. Batanggimin somoirango a•jao 4000 SHG-rangsan gnangchim, indiba skianirangko man•ne da•o an•chingni a•jao ge hajal 42,000 SHG-rang gnang. Poraienggipa chatro chatrirang Graduate-san ong•aigija, anga uamang baksa aro entrepreneur-rang baksa Pilot Project-rangko tarianggen aro tangka paisa dakchakaniko on•anggen” ine Skotong Minister aganangaha.
Ia manianiona Member of Parliament (MP) Agatha Sangma Guest of Honour ong•e sokbaha. Agatha Sangma jinmana aganprakengon, “College-ni motto-ko niatgenchimode, ‘Kamko sandinabe indiba kamko bikotgipasa ong•bo’ ine didiangaha. Uandake an•ching kamko sandigipasan ong•aigija, kamko bikotgipasa ong•na nanga” ine ku•pattiangaha.
Central Agriculture University (CAU) Imphal-ni Vice-Chancellor Dr. Anupam Mishra University-o on•enggipa rokomanti course-rangni bidingo jinmana aganprakangaha. Unbaksana Meghalaya a•dok sorkariko Mission Jackfruit-na bang•a dakchakanirangko on•anganina mittelpilangaha.
CCS, CAU Tura-ni Dean Dr. Jyoti V Vastrad Kolege-ni achievement-rangko jinmana parakangaha. Uamang Purno Sangma-ko Community Science College-ni Founder aro Mentor ong•a ine pangnan gisik ra•na ineba ua agandapangaha.
Ia manianio Agatha Sangma, Annual College Week-o nambate dakgipa House aro Performer-rangna boksisrangko on•angaha, unbaksana Thailand a•songona re•ange Textile-ni course-ko skie ra•gipa chadamberangnaba Certificate-rangko on•angjolaha.
WGH a•jani Deputy Commissioner Swapnil Tembe aro CCS, CAU Tura FSN Department-ni Professor Namita Singh ia manianio dongpae jinmana aganprakangaha.