Sindilgre Govt LP skulo bilsigittam ong•nasipile skigipa dongjani a•sel poraigipa bi•sarang skulna ma•branga
Ampati, 14 May 2022:South West Garo Hills a·jani Salmanpara elakkani ning·o donggipa Sindilgre Govt LP skulo skigipa dongjae songni bi·sarang Skullna ma•brangtokenga ine songni manderang u•iataha.
Koborna u•iatani gitade, Sindilgre Govt LP Skulo re•anggipa 2020 bilsioni da•o 2022 bilsiona skigipa dongjae skulko chipe donengani a·sel songni bi·sarang lekka poraniko skie ra·na man·jaengaha.
Iandakgipa obostarangko Sindilgre songo chagrongna nangengon, department-ni authority-rang aro a•dok sorkari nirok sandie skigiparangko watatna nangachm. Indiba maming nirok sandia dongjae, badiaba skulrango poraigipa bi·sarang bang·jaoba skigiparang sak 3 sak 4 donga. Indakgipa skulrangoniko department-ni authority-rang sandie Sindilgre Govt LP Skulona watatskode songni manderangna dakchakani ong·genchim ineba parakataha.
Uni gimin a•ja ge·antio badita ge sorkari LP skulrang donga aro badia songrango skigipa dongja sandie skigipako watatna nangchongmota. Skullo skigipa dongjani a•sel songni bi·sarangna dal•bea gimaani ong·engaha ine songni manderang suk ong·gijaniko parakataha.
Sindilgre Govt LP Skulni skigipa Ampati Hatisil songoni ong·achim, ua skulni Committee-rangna aro songni manderangna maming u·iatani gri an·tangni kamko Hatisil LP Skulona srik srik ra·jitangaha. Ua songni manderangna maming kobor on·gija an·tangni sika gita Sindilgre skulko wate ra·angaha. Skigiparang indake an•tangni sika gita kamko ra·jitangna man•aima aro department-ni authority-rangba on·aiama ine songni manderang sing·doangaha.
Sindilgre LP Skulo skigipa dongjani gimin songni kangal cholgri bi·sarangna dal·bea gimaani ong·an baksa skul poraianiko dontongna nangengaha ineba u·iataha.
Uni gimin Skotong Ministet Conrad Sangma aro Education Minister, Lahkmen
Rimbui, Sindilgre Govt. LP Skulo ta·rake skigipako sandie watatpachina songni manderang mol·molataha.