SGH-ni DC, SP aro election official-rang lekka pu•onchakram biaprangko niea 

Baghmara, Jan 29, 2023:South Garo Hills a•jani DC, SP, Line Department aro Election Officil-rang Robibar salo, February 27 tariko ong•atenggipa, Assembly Election-na tarisogimin dingtang dingtang Polling Station-rango chu•onga gita paikanarang, dongchakani biaprang, napram dogacholrang, ringani chirang, table-chokkirang, Polling Booth-rango dongma dongja re•ange nieaha ine kobor man•aha.

Unbaksana Bangladesh Sima arini BSF Outpost-rango re•baenggipa Assembly Election-na simsake tarisamsoaniko dake sandirikitaniko dakchina didiangaha.

Jedakode, election-ni somoio maming a•sel ong•a gri tom•tome matchotatna man•gen.

Una agreba, election-na tarisamsoengon, Model Code of Conduc (MCC)-ko ra•gatani bakan dingtang dingtang a•jarango Flying Squad aro Static Serveillance dolrangko pilak check postrango donatmanaha.

Indake ong•engon, saoba MCC-ni niamko pe•e maming ge•etani gri tangka paisarang aro churangko re•ruraanirangko champengna, songdongenggipa manderang jeba MCC-ni niamko pe•gipa manderangni kosako cVigil Apps-ni gita u•iatchina didiangaha.

Maina MCC-ko ra•gatani ja•mano darangba jako tangka gong hajal 50,000-na bate ra•bitna man•jawa ine Chief Election Officer (CEO) parakatmanaha.

Uni gisepon, election-ni somoio candidate-rang aro party-na kam ka•giparang manigija tangkarangko ra•bite, manderangna sualode, tangka ra•chakgipa aro on•gipa manderangko Section 171 A, C-o pangchake dai gamna nanggen aro bilsisa pattoko donatgen ineba mikkrakataha.