Baghmara, October 27, 2022: South Garo Hills a•jani ning•o donggipa Mindikgre songni saksa Daniel Ch. Marak-ni kosako adita bilsirangna kal•steke aro gisikni gita sinjetanirangko on•gipa manderangni kosako badi ka•na gita Baghmara Pulis Station-ni Officer In-charge-na lekka sedoataha.
Daniel Ch Marak-ni janapatani gitade, “Ua 2015 bilsio Assam Goalpara a•jani ning•o donggipa Agam songni Sendy G. Momin-ko jik kime uano dongkamaha. Indake ua Agam songo jikgipa baksa dongengon, ua kal•stekako aro gisikni gita sinjetanirangko man•aha. Bang•a salon Algrin Ch. Marak, Sapjina M Sangma, Hemendas Hajong, Tamchi M. Momin, Bijet M. Momin, Chandi Momin aro Rospel Momin, uko so•ote galna cholko am•e dongachim. Indake 2021 bilsini November 20 tariko Hemendas Hajong aro Tamchi Momin sorkarini dongimin niam, Right To Religion-ko pe•e, uamangni olakkimiting somoio video ka•e, namgija kattarangchi katta bichong ba caption on•e social media-o upload ka•aha. Indake ua saksa bebe ra•gipa ong•e, uamangko kema watenba video-ko delete ka•e galaha. Uasan ong•aigija 2021 bilsini November 14 tariko, Bijet Momin giljaona re•angenba Pamong sakgnini mikkango uko ong•gija potdrae kal•steke roaha, unbaksana apsan jani 27 tariko Rospel Momin aro Bijet Momin jiksesa uko kragijagipa kattarangchi agane kal•steke roa baksana gilja nokni adita bosturangko nosto ka•e galangaha. Indake Algrin Ch. Marak, Sapjina M Sangma, Hemendas Hajong, Tamchi M. Momin, Bijet M. Momin, Chandi Momin aro Rospel Momin jinma apsan ku•monge 2022 bilsini July 17 tariko, uni kosako tol•e badi ka•aha. Uamangni badi ka•anina Dudhpara Pulis Station-ni pulisrang angko sing•sandina July 25 tariko okamate pulisrang kal•steke aro ka•mikkenate roaha” ine ua janapataha.
October 14 tariko ua ripengtangni siako bon•kame mikkang nirikna songtangona re•baaha. Indake ua songtangon ma•ni noko 18 tarikona dongangaha. Indake Robibar salo uni songona re•baaniko kobor man•enba, ripengskarang aro maharirang uko grongna re•angtokaha, jeon Sapjina M Sangma-ba re•angpaaha. Indake Sapjina M Sangma uko gronge noktangchi re•angpilon, segipa Algrin Ch Marak-na, angni kosako tol•e on•aha. Sapjina M Sangma-ni tol•e aganani gitade, anga aro angni ba•rimarang Chandi Momin-ko so•ote galna ku•mongenga ine aganaha. Uamang jiksesa (Algrin aro Sapjina)-ni tol•e agangipa kattarangko, Chandi Momin-na phone ka•ate u•iataha. Koborko man•soani ja•mano Chandi Momin aro uni maharirang tom•aniko ong•ate, Daniel Ch Marak-ni kosako badi ka•aha.
Uamang angni janggiko aro angni toromo donganiko bon•kimatna krenge kamrangko ka•enga. Uamang angko jikni songchi rimangpile salanti kal•steke rona aro angni janggiko bon•atna miksonganirang gnang. Uni gimin anga pulisrangchi dingtang mancha angni janggiko naljoke rakkina aro angna kakket bichalko on•china mol•mole lekka seataha.