Baghmara,March 8,2022: March jani 8 tarikko a•gilsak gimikchin me•chik rangni sal ba International Womens Day ine skangonin manirongbaa. Ia salo an•ching a•gilsak gimik o donggipa pilak me•chik rangko uamangni kamrangna gisik ra•e mitelpilaniko on•a manironga.
South Garo Hills a•jani Rongara Block ni ning•o donggipa Dambuk A•ga songo District Social Welfare Department, One Stop Centre (OSC) aro National Tuberculosis Elimination Program (NTEP) ni gita me•chik-rangni salko manidilangaha ine koborko man•soaha.
Ia manianiona Dambuk songni L.P skulo skigipa ni kamko ka•e sorkarini nengtakatako man•e dongenggipa Pa Kraisbinath Ch. Momin mongsonggipa mande ong•e sokangaha aro me•chik rangni SHG dol uamangni ka•srokbegipa ku•rangchi ringmitellaniko dakangaha.
Ia tombimonganio DSWO ni Supervisor Ma G A. Sangma rimchaksoaniko kattarangko aganangaha unbaksana OSC Department ni Chingme R Marak, Grinberth R. Marak, DSWO Department ni S.S.Koch, DTO John K Marak, DRTB HIV Coordinator S R.Marak mitelpilaniko kattarangko aganenba tombimonganiko matchotataha.